NSCN (IM) leh Kohhran hruaitute Chandel-ah inbia

Naga helpawl, NSCN (IM) hotute leh Naga kohhran hrang hrang hruaitute chu Chandel-ah February 9 khan inbiain an ṭawngṭaiho.

' Naga inremna kawnga kohhran mawhphurhna leh ram inchuh thubuai, khawtlang sualna thila kohhran chhanletna' tih thupui hmangin inbiakna hi neih a ni a, Chandel District Christian Forum (CDCF) nen ṭangtlangin Abungni Baptist Church hmunpuiah neih a ni.

Inbiaknaah hian mi 200 vel zet, Naga rama kohhran hrang hrnga hruaitute, pastor te, hnam bil aiawh, lal, ṭawngṭai pawl bakah Rev. Vitovi Yeptho leh Vikuto Kappo, CNC leh Hebron pastor te an tel.

Sorkar laipui leh NSCN ten August 3, 2015-a inrem-na lailawk (Framework Agreement) an siam nem-nghehna, thlawpna, ngaih-hlutna lantir nan thla tin Pathianni hmasa berah chawnghei ṭawngṭai neih ziah an rawt a, MLA leh MDC zawng zawng pawh ram inchuh thubuaiah theihtawp chhuah tur leh kohhrante pawh ram humhim tura thawk turin thutlukna an siam bawk.

Inhmuhkhawmnaah hian Central Pastor, Council of Nagalim Churches, Reverend Dheutui Zeme, PRO of AC BN, K Wangshol, CNPO president Ws Kanral Anal leh Chief Administrative Officer of Khurmi region Ts Prem ten thu an sawi a ni.

Dheutui Zeme chuan sorkar laipui leh NSCN inrem lailawkna tlangpui a tarlang a, CDCF president Rev Longam kaihhruaiin kalkhawmte hi an ṭawngṭai rual a ni.