Kum 2017-ah Agartala-Akhaura rel kawng zawh beisei

Agartala, Tripura leh Akhaura, Bangladesh inkar rel kawng kilometer 15-a thui siam mek chu kum 2017 chhunga zawh hman beisei a ni.

State Transport Secretary Samarjit chuan, he inkalpawhna kawng siam nan hian Prime Minister Office-a Ministry of External Affairs leh Railways Ministry meeting chuan chheng vaibelchhe 580 an rua-hman thu a sawi. He rel kawng hian Bangladesh ram chhung kilometer sawm a thui a awh ang a, a bak chu India ram chhung a awm tur a ni thung.

He ruahmanna a hlawhtlin thei nan technical team 'IRCON' din a ni a, State aiawh, Indian High Commission official leh Bangladesh Foreign Ministry official- te an tel. Samarjit chuan, kilometre 3.7 a thui flyover siam a nih tur thu leh hei hian India ram chhunga lo neihna ram zau tak tih chhiat a nih loh nan ruahman a nih thu a sawi. New Delhi atanga West Bengal leh Tripura, Bangladesh ram kal tlanga thlunzawmna tur rel kawng pawh siam tum mek a ni bawk. He kawng hi siam a nih chuan Agartala leh Kolkata inkal pawhna tur kawng pawh a tawi phah sawt dawn a ni.

Kum 2010, January thla khan Bangladesh Prime Minister Sheikh Hasina leh Indian Prime Minister Manmohan Singh ten New Delhi-ah he ruahmanna hi an siam a ni. Tripura transport Secretary Samarjit Bhowmik chuan,“India external affairs ministry leh Development of North Eastern Region ten sum senso hi an tum dawn a ni" a ti. Agartala-Akhaura rail kawng hi siam zawh a nih hun chuan India ram hmar chhak tan leh Bangladesh ram chhak lam tan hmasawnna tam tak a thlen dawn a ni.