Assam sorkar thilsem Gauhati HC-in titawp rih

Gauhati High Court chuan Thawhlehni khan Assam sorkarin mipui hamṭhatna tur ruahmanna a siam bawhzuia rizai, la hlum, tractor leh power tiller a sem mek chu chhunzawm tawh lo turin a hriattir.

Gauhati HC in thu­tlukna a siam chhan hi tlawmngai pawl pakhat Assam Public Works (APW) in PIL an thehluh vang a ni. HC chuan state sorkarin Handloom & Textile department leh Agriculture department kaltlanga Chief Minister Special Package hming­chawia bungrua a sem mek chu titawp turin a hriattir ta a ni.

Assam sorkar hian Assembly Constituency tinah chhungkaw 12,500 tan la-hlum, chhungkaw 7,500 hnenah rizai, chhungkaw 10 hnenah tractor leh chhungkaw 20 dang hnenah power tiller a sem a ni.

APW in court-a thu an thehluhah chuan hetiang hamṭhatna dawng tur hian advertisement tihchhuah a nih loh bakah inkaihhruaina mumal duan a awm lo niin a tarlang.

Justice Hrishikesh Roy leh Justice Manjit Bhuyan chuan PIL thehluh hi ngun taka an ngaihtuah hnuah, bungrua semchhuah chu titawp nghal vat turin thupek an tichhuak ta a ni. HC chuan bungrua semchhuah tawhte erawh chu lakkir a ngai tawh lo tih tarlangin, a thara semchhuah a awm tawh tur a ni lo tiin thutlukna a siam thung.

High Court chuan Assam sorkar chu nitin chanchinbu lian pali-ah advertisement tichhuak tur leh, hamṭhatna dawng turte pawh a thara zawng turin a ti bawk.

Assam-ah hian assembly inthlan a hnai tawh a, March thla lai­hawlah chuan inthlan hun hi puan a nih beisei a ni. Hei vang hian tun hun hi remchangah an hmang ta mai nia hriat a ni.