Manipur-ah African Swine Fever a leng

Manipur veterinary and animal husbandry department chuan Manipur-a African Swine Fever (ASF) a len thu puangin, Imphal West District-a Central Agriculture University chu hri darh ṭanna hmun niin a sawi.

Imphal West deputy commissioner leh Veterinary and animal husbandry department director-te chuan Imphal West aṭanga vawk lut leh chhuak tur khapna thuchhuah inṭawm siamin, Imphal West hi restricted area-ah an puang chhunzawm nghal a ni. An thuchhuahah hian eng ransa mah, a thi emaw a dam emaw lak chhuah phal a ni lo tiin an tarlang. Prevention and Control of Infectious and Contagious Disease in Animals Act, 2009-in a tarlan angin, mi tu pawh dan pela che leh dan kengkawhtu thu zawm lo chu hrem theih an ni ang tiin an tarlang bawk.

Manipur-a ASF leng hi Imphal West leh Imphal East bakah Kakching-a farm hrang hranga vawk vulhtute'n an vawk vulhte an thih nasat thu an report aṭang hriat a ni. Vawk thi aṭang hian Manipur veterinary and animal husbandry department chuan sample lain Guwahati-a North Eastern Regional Disease Diagnostic Laboratory-ah an thawn a, lab report hmuh a nih hnuah department lam hian ASF leng hi an puang ta a ni. Mithiamte chuan Manipur-a ASF leng hi Myanmar leh Bangladesh emaw, north-east state dang aṭanga vawk lak luh vang a nih theih thu an sawi.

Hmarchhak state hrang hrangah hian vawk sa an ei nasa a, hmarchhak bial puma vawk sa aṭanga sum che vel hi Rs. vbc 8,000-10,000 anga chhut a ni. Assam hi vawk sa thawn chhuak nasa ber a ni. ASF avang hian Manipur ṭhenawm state Mizoram pawhin 2022 khan sum tam tak a lo chan tawh a, chhinchhiah chinah ASF avang hian vawk 33,400 an thi a ni.