Manipur: 'Andro Dreams'-in best documentary dawng

Jagran Film Festival vawi 8-na chu Pathianni khan Mumbai-ah hman a ni a, Manipur thingtlang khua, Andor aṭanga hmeichhe football club zinkawng film-a an siam, 'Andro Dreams' chu best documentary atan thlan a ni.

'Andro Dreams' hi Dr Meena Longjam direct a ni a, hmeichhe pakhat Laibi chanchin a thlur bing a ni. Laibi hi kum 60 mi niin, AMMA FC football club chu kum 20 chuang a lo enkawl tawh a ni. Mi tumruh leh chhel tak a ni a, retheihna leh helna hnehin hnehchhiahna a tawhte pawh a paltlang vek a ni. Thlawpna leh ṭanpuina mumal pawh dawng loa AMMA FC a enkawlna hnuaiah hian ram leh khawvel huap football player a chher chhuak thei. Documentary-ah hian football khelh chak, player naupang tak takte duhthusam thleng dik an lawmna entir a ni ber a, football hmanga inpumkhatna leh remna pawh a keng tel bawk.

Andro Dreams hian India bakah international film festival thlengin ngaihven a hlawh a, Kerala-a IDS-FFK-ah pawh pho chhuah tura thlan a ni a, Korean International Ethnographic Film Festival leh 2023, Festival Internacional de Cine de Fusagasuga-ah pawh chhuah a ni dawni. Dr. Meena chuan,"Tun hma zawng aiin remna leh muanna hi kan mamawh zual a ni. Heng football player-te beisei ram chungchang film kan siam kaltlang hian Manipur mipuite pawhin zir tur an neih ka beisei. Heng hmeichhe naupangte thil tum sang ropui tak avang hian inpumkhatna leh kan state-in kan mamawh em em, inlungrualna, India anga kan neih theih kha min neihtir leh se ka duh ber," tiin a film siam kaltlanga Manipur tana a beiseite a sawi chhuak.

Dr. Meena Longjam hian 2015 khan a documentary siam tho, 'Autodriver' hmangin national award a lo dawng tawh bawk. 'Autodriver'-ah hian Imphal-a hmeichhe autodriver hmasa ber chungchang tarlan a ni.