Arunachal Pradesh-ah Chindang festival hmang

Arunachal Pradesh-a West Kameng district-ah Chindang festival an hmang mek. He festival hi Sajolang (Miji) community festival niin, an ṭawngṭaina leh an serh leh sang zawng zawngte chu thil siam dangte tan an hlan ṭhin.

Arunachal Pradesh deputy chief minister Chowna Mein chuan fetival hi hmanpuiin, Sajolang community chu an hnam kalphung leh tihdan an vawn nun avangin a fak a, hnam nunphung vawng him thei nih chu a pawimawhzia a sawi bawk. Sorkar chuan hnam tlem zawk leh ram neitu dik takte humhim a ngaihpawimawh thu a sawi a, an hnam zia rang kalsan lo tura chhuan thar zawkte zirtir leh an hnam nunphung vawng him tura an ṭanho pawimawhna te a sawi.

Mein chuan AP chu sum leh pai dinhmunah a ṭhan nasat thu leh, an state GSDP pawh 2016-17 leh 2023-24 inkara Rs. vbc 22,100 aṭanga Rs. vbc 48,028-a a pun tawh thu a sawi."Kan state kum khat budget pawh a pung nasa hle a, Rs. vbc 11,553.65 aṭangin Rs. vbc 29,512.82 a ni tawh a ni. Sum leh pai dinhmun ṭha hian Arunachal Pradesh hi hmasawnna hna hrang hrang thawk thei turin min pui a ni," a ti.

Chindang festival-ah hian Union Minister, Kiren Rijiju chu chief patron niin, AP chu hnam nunphung leh tihdante an vawn ṭhat avanga an chhuanawm thu sawiin, Sajolang hnam pawh entawntlak a tih thu a sawi a, rual u zawkte chu an naute hnenah an hnam tihdan an zirtir chhunzawm zel avangin lawmawm a tih thu a sawi bawk.