Assam-ah danloa luhruk tih tawp a ni ang : BJP president

BJP president Amit Shah chuan Bangladesh aṭanga dan loa Assam-a lut ru awm ṭhinte chu tihtawp a nih tur thu a sawi.

BJP President hi 14th Bodoland Day celebration, Bodoland Territorial Council Secretariat Fielda lawmnaah khuallian atan sawm a ni a, he hmuna a thusawinaah hian he thu hi a sawi a ni. Amit Shah chuan,"Assam-ah BJP leh BPF tawngkawp ten sorkarna an siam a nih chuan, a bik takin Bangldesh atanga Assam-a danloa mihring lut ru thin chu tihtawp a ni ang" a ti. Tunah hian phalna neiloa Assama awm mek te zawn chhuaha thawn haw mek an ni a ti bawk. Heng danloa ramdang atanga Assama lut te hi Congress party ten vote an duh lut vanga lo intan niin a sawi a, heng mite hian ram mi leh sate thawh tur tam tak thawk an thawk a, hei vang hian sorkarna kan siam a nih chuan kan titawp vat ang tiin BJP president chuan a sawi.

Kum 2016-a assembly inthlan lo awm turah hian BJP leh BPF te chu an thawkho dawn a, sorkarna an siam ngei a rin thu Amit Shah chuan sawi. Hei hi politics avanga inremna a ni satliah lo a, Bodoland bialin hmaa sawn theihna tur kan ngaihtuah vang zawk a ni, a ti.

BTC Chief Executive Member Hagrama Mohilary chuan Bodoland Territorial Council area tih hmasawnna turin cheng vaibelchhe sangkhat ruahman a nih tur thu a sawi a, hei aia tam hi BJP-in sorkarna an siam chuan an ruahman dawn tih Amit Shah chuan sawi. Shah chuan kum 1962-a India leh China an indo ṭum khan India chuan China a ngamlo hle a, hetih hunlaia India Prime Minister Jawaharlal Nehru pawhin hmarchhak state te chu China sorkar kutah a chan mai dawnin a ngai hman hial, mahse India sipai huaisen tak tak ten an chhanhim thei hram a ni, a ti bawk.

Assam-a sorkarna chang mek Tarun Gogoi kaihruai Congress party chu sawi zuiin,"Assam chu India ram state zinga a hausa ber te zinga mi a nih ṭhin a, tunah chuan a hnufual ber zing a mi a ni" a ti. Assam-ah hian BPL chhungkua vaibelchhe khat chuang an awm a, sualna a pung nasa a, a bik takin hmeichhiate lakah suahsualna a pung a,India ramah a sang ber a ni tiii, hmeichhiate dinhmun a himlo tak zet a, amaherawh chu he thil tireh tur hian sorkarna chelh mektu hian hma an la lo, a ti.

BJP president Amit Shah hi Union Sports and Youth Affairs Minister Sarbananda Sonowal, Himanta Biswa Sarma leh Bijoya Chakraborty ten an ṭawiawm a ni.