Assam sorkarin damdawi-ah subsidy pek tum
Assam Chief Minister Tarun Gogoi chuan ram pawn aṭanga damdawi lakluh, nunna chhanna tur ang chi hoah subsidy pek tura ruahmanna siam a nih thu a sawi. Ram pawn aṭanga damdawi lakluh, sorkar laipuiin custom duty-a chhiah an awl ṭhinah chhiah lak thar an tumna ang chi ho pawh a huam dawn a ni.
Tarun Gogoi chuan, "Kan tum ber chu mi nawlpui te chhawmdawl a ni. Tun hnaia damdawi man sang thar hoah te subsidy pek zel kan tum a ni" a ti. Mahse CM hian subsidy pek dan tur duante a sawifiah lo.
Gogoi chuan sorkar laipuiin tunhmaa damdawia chhiah a lak ngai lohna te lak thar an tum chu mi rethei ten an tuar dawn avangin a dem thu a sawi bawk.
CM chuan, "Sorkar chetlak dan hi atthlak tak a ni. Thutlukna hi rethei neksawrna, mipui nawlpui hnuaichhiahna a ni. NDA in sorkarna an chelh aṭangin nunna chhanna tur damdawi man a sang chak hle. Mi nawlpui tana ding tura an intiamna kha khawnge a awm tak" tiin NDA sorkar a bei zui.
January thla tawp khan Central Board of Excise and Customs chuan thuchhuah siamin, ram pawn aṭanga nunna chhanna tur damdawi lakluh ṭhin 74 a chhiah awl ṭhin tihtawp a nih thu a puang. Heng damdawi chhiah awl ṭhin tihtawp takte hi, kala lungte awm enkawlna te, chemotherapy leh radiotherapy, lung ṭhalo enkawlna te, zunthlum damdawi, Parkinson disease enkawlna, ruh damdawi, hliam enkawlna atana hman antibiotics ho te an ni.