Gogoi-a lakah Intihhmingchhiat thubuai siam leh

Assam Chief Minister Tarun Gogoi-a sorkara Cabinet minister ṭhin, BJP a zawm hnua Assam BJP hruaitu ni ta Dr Himanta Bishwa Sharma chuan Gogoi-a lakah a chanchin chhe taka sawiah puhin intihhmingchhiat thubuai a thehlut a, cheng vaibelchhe 100 chawi turin a khing.

Himanta Sharma hian Congress party zawm leh duhin New Delhi-a Congress hruaitute a dawr reng niin Gogoi chuan a puh. Himanta hian nikum september thla khan Congress-a chhuahsan a ni.

Gogoi-a sawi dan chuan, 'Himanta hian Congress zawm leh a duh vangin New Delhi lama Congress hruaitute a be pawp reng a ni. Mahse, thutlukna siam tur chuan High Command an awm a ni. Pawm anih dawn chuan ka dodal ang, amah hi thuneihna duh leh zunglawr a ni. ULFA aṭangin AGP, a hnuah Congress, tunah BJP a zawm leh ta a ni. Kei leh CM hlui boralta Hiteswar Saikia khan a rintlak loh zia hi kan hrechiang a ni' a ti.

Himanta awmna piangah vanduaina a thleng ṭhin a, tunah BJP ah a thlen a hun ta chiah a ni tiin Gogoi chuan a sawi.

Dr Himanta Bishwa Sharma chuan "Naktukah defamation case thubuai ka thehlut ang a, Congress zawm leh tura min puh avang hian Cheng vaibelchhe 100 chawi turin ka khing dawn a ni" a ti. Himanta hian Gogoi-a lakah inpuh hmingchhiatna thubuai a lo thehlut tawh a, mahse ngaihtuah mumal a la ni lo. Gogoi-a hi court-ah vawi khat a inlan tawh nghe nghe a ni.