AMUCO-in Sorkar laipui leh NSCN(IM) inremna tlangzarh phut

All Manipur United Clubs’ Organisation (AMUCO) chuan sorkar laipui leh NSCN(IM) inremna, 'Framework Agreement' chu mipui hriata tlangzarh thuai a nih loh chuan lungawilohna lantir an tum tih an sawi.

AMUCO hian Pa-thian-ni khan Kwakeithel hmuna an pisa-ah an din champha vawi 23 na an lawm a, AMUCO president Dr Y Mani Khuman chuan kum 1997 August 4 khan sorkar laipui leh NSCN(IM) ten inkahhai thuthlung an ziah avangin an state humhim nan kawngzawh runpui an buatsaih tawh tih a sawi. Khatih laia kawngzawhtute kha nuai nga zet niin, South East Asia rama kawngzawh ropui ber a ni. Kawngzawhtute auhla ber chu an state inpum-khatna humhim a ni.

AMUCO hian India sorkar leh NSCN(IM) inremna ziah chu an thli-thlai reng a, Indo-Naga inbiakna palai RN Ravi hnenah inremna kimchang hi mipui hriatah puangzar (white paper) tura phutna an hlan tawh a, chhanna an dawng thuai lo a nih chuan a rang thei ang berin lungawilohna kawngzawh an huaihawt dawn tih Dr Y Mani Khuman a sawi.

AMUCO hian sorkar laipui leh NSCN(IM) inbiakna mai ni lo, state chhunga sipai leh police ten lem an chan ṭhin te, ramri chungchang te, inlungrualna, hnam hrang leh khawtlang te inlungrualna awm theih nan te an thawk ho a ni.