Manipur zirlai ten kawng dang leh dawn

Kuki Students’ Organisation (KSO) leh All Naga Students’ Association, Manipur (ANSAM) te chuan February ni 17 zanlai aṭangin an thilphut tih-hlawhtlin a nih theih nan National Highway dan chhunzawm leh an tum.

He thu hi kar kalta Zirtawpnia joint meeting an neihah zirlai pawl pahnih ten thuchhuah siamin an tarlang. Thuchhuahin a tarlan danin, sorkar chuan zirlai pawlte thilphut a tih hlawhtlin loh avangin nawrhna hi an chhunzawm leh dawn a ni. Zirlai pawl te hian Manipur tantlang National Highway pathum chu danchah an tum a ni.

Zirlai pawlte hian zirtirtu kum 2006-a lak te chu dahngheh an phut bakah, zirtirtu lakbelh an phut bawk. An thilphut tihhlawhtlin nana kawngpui an danchah chu an tawp san lailawk tawh a, mahse sorkarin an thil phutte a tihhlawhtlin mai loh avangin an chhunzawm leh dawn ta a ni. An hlawhtlin hma chu tawpsan mai an tum loh thu an an sawi bawk.