India-Bangladesh joint military exercise zo

India leh Bangladesh-in joint military exercise an neih (SAMPRITI-XI) vawi 11-na, October 3-a Umroi Joint Training Node, Meghalaya-a an ṭan chu Thawhṭanni khan an zo ta. Military exercise hi Umroi-ah hian a tawpna siam a ni a, India leh Bangladesh sipaite chuan an tum leh mamawhte an zir chhuak thei niin an sawi.

Joint military exercise hi UN rorelna (UNPKO Chapter-VII)-in a phut angin khawl hmanga hnathawh thiamna lam zir nan leh operation hlauhawm tak tak atana joint task force intirh chhuah dante zir nana hman a ni. Military exercise-ah hian Bangladesh 52 Infantry Brigade aṭangin sipai 170 leh India rama 15th Battalion aṭangin sipai 170 te an tel bawk a, an vai hian sipai 340 an tel a ni. 66 Mountain Brigade aṭangin Rajput Regiment te chuan he exercise hi an hmanpui bawk.

Military exercise hi chhawng hniha kalpui a ni a, Command post exercise leh field training nei tela validation exercise te neih a ni. Indona hmuna natna enkawl te, cordon siam leh zawn hna kalpui dan te, room luhchhuah dan bakah tunlai hmanraw changkang leh ṭha zawkte hman dan pawh an zir tel bawk a ni.

Indo-Bangladesh joint exercise hi kum 2009 aṭang khan kalpui ṭan a ni a, ram pahnihte inkarah inzawmna ṭha zawk a siam bakah, inṭhian ṭhatna leh inhriatthiam tawnna te a siam nasa em em a ni. Exercise khar niah hian sipai che ṭha zualte chawimawiin, volleyball-te an khelho a, zan lamah campfire te an siam bawk.