Barak Valley ṭhen hran duh loin ULFA-I in thuchhuah siam

Barak Valley, Assam-a Barak Democratic Front (BDF)-in state hran ngiata Barak Valley ṭhen hran an duh thu an au chhuahpui hnuah, United Liberation Front of Asom-Independent (ULFA-I) chuan Assam-a Bengali ṭawng hmangte hnenah ngenna siamin, Assam aṭanga Barak Valley ṭhen hran tumna chu dodal tur leh, ni 60 ral hmang ngeia an ngaihdante sawi chhuak turin an sawm.

ULFA-I-in thuchhuah an siamah hian Bengali ṭawng hmangte chu hun tiam chhunga Barak Valley ṭhen hran an duh lohna an lantir lo a nih chuan an chungah eng pawh thleng se anmahni mawh a nih tur thu an tarlang a ni.

Email an thawn chhuahah hian ULFA-I chuan Assam-ah hnam hrang hrangte chu inngeih taka an chenho tawh ṭhin thu sawiin, hetih lai hian mi pakhat, Pradip Dutta Roy chu Barak Valley ṭhen hran duhtu zinga a bul tumtu leh sul sutu a nih thu an sawi. Assam ṭhen hran tumna reng reng chu an dodal thu sawiin, Pradip Dutta Roy chuan eng dikna chanvo mah a neih loh thu leh, an thlahtute pawhin partition a awm lohna atana hma an lak ngai loh thu an sawi bawk.

Barak Valley-ah hian Bengali ṭawng hmang Hindu leh Assam chhim lamah Muslim-te an cheng tam ber a, hemi huam chhungah hian Cachar, Karimganj leh Hailakandi te pawh an tel a ni. Assam-a assembly seat 126 awm aṭanga seat 16 hi helai huam chhunga awm hi a ni. Assam-a hruaitu thlan tam zawk hi Assamese tamna, Brahmaputra Valley lam mi an nih ṭhin avangin Barak Valley-a changte hian ngaihthah an nih thu leh, en kan an nih ṭhin thu an tlangaupui fo a, tunah state hran an ngiat leh ta a ni.