Bengngawng awmlohna state-ah Assam siam tum 'Shravan' project-ah cheng vbc 20 ruahman

Assam Chief Minister Tarun Gogoi chuan Prerana pawlin Srimanta Sankaradeva Auditorium, Panjabari-a bengngawng awmlohna state-a Assam siamna tur 'Shravan' project a siam chu Pathianni khan a hawng a, he project atan hian cheng vaibelchhe 20 ruahman a ni.

Gogoi chuan bengngawng awm lohna state siam turin kawng thui tak zawh a la ngai tih sawiin, hmuikak awm lohna state-a Assam siamna tur Operation Smile pawh hlawhtling taka an kalpui tawh thu a sawi. Shravan project hian Assam, chu bengngawng awm lohna state ni turin a siam dawn a ni, a ti.

Prerana hi IAS officer thawk mek leh chawl tawh nupuite inhlawmkhawm pawl a ni. Gogoi chuan Prerana hmalakna chu fakin, mi rethei leh chhumchhia te, khawtlanga chenbeh zawkten nun ṭha zawk an tem theih nana hmangaihna leh lainatna nen an luangchhuak chu lawmawm a tih thu a sawi.

"Mi tin hian mi rethei leh chhumchhia ten leirem an rah theihna turin hmangaihna leh duhsakna thinlung pua ṭanpui hi a ṭul reng a ni. Valentines Day ni khera hetiang midang hmangaihna neia luanchhuah hi a inhmeh tak zet a ni" tiin CM chuan a sawi.

UK-a hmunpui nei Ideal Charity Director Dr. Nareshwar Sinha chuan Prerana leh NRHM nen ṭangtlanga hna an thawk ho tur chu lawmawm a tih thu sawiin, Assam hian naupang beng ṭhalote tan lawmna a thlen dawn a ni, a ti. " Naupang rualbanlote tana thawh hi thinlung taka ka chak a ni ṭhin. Chief Minister duhsakna dawng chungin Assam hian hma lam eng tak a nei a ni" a ti.

Dr. Sinha chuan naupang beng ṭhalote hnenah bengdar ṭha ber chi hlir a thlawnin an hlan dawn a, an beng ṭhat loh dan kimchang endik a nih hnuah an mamawh dan mil zela pek an ni dawn tih a sawi.

Prerana president Suman Pipersenia pawhin thu sawiin, Shravan project chu NRHM, Assam leh Ideal Charity-ten pawlho nena an thawhdunna hmasa ber a ni a; Social Welfare Department leh NRHM, Assam te nen naupang beng ṭhalo 160 zet an chhinchhiah tawh tih a sawi. "Naupang 160 zinga 40 chu zai tenau hmanga enkawl an nih hnuah chhuahtir an ni a, midangte chuan Mohendra Mohan Civil Hospital-ah enkawlna ṭha zawk an nei mek a, Ideal Charity hnen aṭanga bengdar an dawn pawh vuahsak an ni" a ti.