Tarun Gogoi-a'n Union Finance Minister hnenah mamawh a thlen

Assam Chief Minister Tarun Gogoi chuan Union Finance Minister Arun Jaitley hnenah Assam state mamawh hrang hrangte a thlen. Assam chu Special Category Status-ah dahlet leh tur leh, kum 2016-17 atana State Plan sum tipung turin a ngen.

Tarun Gogoi hian nimin khan Union Finance Minister Arun Jaitley chu lehkha thawnin state mamawh te a thlen a, chung zingah chuan Centrally Sponsored Schemes chungchang te, Central Sales Tax (CST), Value Added Tax (VAT) leh chhiah chi hrang hrang te a tel.

Chief Minister chuan tuilian leh leiminin state chhung mipuite tan harsatna tam taka a thlen ṭhin sawiin, leimi ven nan leh a tuarte tanpuina chu sorkar laipui nen ennnawna a tul anga hmalak nise a duh thu a sawi. Brahmaputra lui lian chuan kum tin mi tamtak nunphung a tihbuai ṭhin thu te, Brahmaputra Valley River Basin Authority din a duh thu te, Indo-Bangladesh border leh Assam-Nagaland border chungchang te a thlen a ni. North East Industrial Investment Promotion Policy kum 2007 aṭanga kalpui tawh chu tharthawh leh tur leh, Ministry of Micro Small and Medium Enterprises sector tih changtlunna tur special package siam ni thei se a duh thu te a thlen bawk.

Gogoi chuan an ram chhunga samak ki pakhat nei(one-horned rhino) mang mek chu a ngaimawh thu leh venhimna dan ruahmanpui turin sorkar laipui chu a ngen a, State police tih changtlunna tur a thlen bawk. Assam state paltlangtu Mizoram, Manipur leh Tripura panna National Highway chu thawmṭhata tih changtlun te, Inland Water Transport Development, Guwahati Airport thuam ṭhat, multi-modal international aviation hub, Smart Cities project hnuaia Golaghat, Silchar, Jorhat, Tezpur, Tinsukia, Barpeta leh Bongaigaon cheiṭhat, khawpui chhunga tui in tur thiang hlim leh faina kawnga hma an sawn theih nana hmalakpui tura ngenin CM chuan Union Finance Minister Arun Jaitley hnenah lehkha a thawn a ni.