Nagaland CM-in Manipur bill a sawisel

Nagaland Chief Minister T.R. Zeliang chuan Manipur sorkarin nikuma bill pathum an pass tak, tlangmi hoin an duhloh em em "anti-tribal bill' tia an vuah chu a sawisel a, ram danpui kalh a nih thu a sawi.

Ukhrul district, Manipur-a Naga hnam in thlai chi thlak kut an lawmna 'Lui Ngai Ni'-a thu a sawinaah, Nagaland CM chuan 'Congress sorkar hian kum 2017 a Assembly inthlan thlir ranin phaimi te tan chauh mit an meng a, bill hi hian Naga hnam nunhlui hrechang hauhloa pass a ni bawk' a ti.

Hetih lai hian Manipur Congress legislator N. Biren chuan pawl ṭhenkhatin khuallian atana Nagaland Chief Minister an sawm chu Manipur mipui
ṭhendarhna leh inrintawn lohna thlentu a nih theih thu a sawi. "Manipur tlangramah hian silai kengten an duh zawng an vote tlin tir aṭang tawhin democracy a awm lo hrim hrim a ni," a ti bawk.

Zeliang ve thung chuan Ma-nipur Assembly-a Naga People’s Front MLA palite chuan bill duh loh vangin banna an thehlut niin a sawi a, an banna hi Speaker-in a pawmsak duh rih lo niin a sawi.

August 31, 2015-a Manipur Assembly-in bill pathum Protection of Manipur Peoples Bill 2015, Manipur Land Revenue and Land Reforms (seventh amendment) Bill 2015, and Manipur Shops and Establishment (second amendment) Bill 2015 an pass hnu khan Manipur-ah hian buaina a inṭan chho a, bill te hi President kutah a la awm a ni.

Lui Ngai Ni lawmnaah hian Nagaland CM chuan, mipuite chu taima lehzual turin a fuih a, tourism lama ṭan la turin a fuih bawk. Naga tlawmngai pawlten Manipur, Nagaland, Assam leh Arunachal Pradesh-a Naga awmte huap vekin kutpui buatsaih se a duh thu sawiin, mipuite chu sorkar laipui leh Naga inremna kawngzawh a fel theih nan theihtawp chhuah turin a ngen bawk.