Manipur college zirtirtute'n chaw ngheiin nawrh huaihawt

Manipur-a govern­ment college-a zirtirtute chuan an thil phut tihlawhtling tura sorkar nawr nan chaw ngheiin nawrh an huaihawt. 

Federation of Go­vernment College Teachers' Association (FEGOCTA), Manipur hian January 28 aṭang khan sorkara an thil  phut 10 tihhlawhtlin phutin nawrh an huaihawt tawh a, an phut zingah hian 7th UGC Pay and Regulations 2018 hman tel pawh a tel. 

January 28 aṭangin sit-in protest hi an huaihawt a, mahse sorkar lam aṭangin an duh ang chhanna an hmuh loh avangin Ferbuary 3 aṭang khan class pawh an la tawh lo a ni. February 6-a Imphal-a kawngzawh an tum chu police-ten an dang a, hemi hnu kar liam ta Inrinni aṭang khan chaw ngheiin nawrh hi an huaihawt chhunzawm a ni. 

FEGOCTA vice president RK Indira chuan state sorkarin an thil phutte hi a tihhlawhtlin loh chuan, February 14 aṭanga post-graduate examination neih tur chu an boycott dawn tih a sawi. Indira chuan sorkarin 7th UGC Pay and Regulations 2018 a hman hma chuan college hrang hrangah chaw ngheia nawrh hi an huaihawt chhunzawm zel tur thu a sawi. 

State sorkar chuan an thil phutte hi tihhlawhtlin tiamin, state cabinet pawhin a thuphungin 7th Pay hman hi a pawmpui tawh a, mahse tun thlengin a taka hman a la ni lo tih Indira chuan a sawi. Nikum September thla aṭang khan an thil phutte tihlawhtling turin state sorkar chu an nawr tawh a, sorkarin a ngaihsak loh avangin sorkar nawr nan loh theih lohin chaw ngheia nawrh hi a ngai ta a ni, a ti.