Sikkim tuiliana thi zat 40 tling tawh, mi 76 la hmu lo

Ruah leh rial nasa tak thawk thut avanga Sikkim Teesta lui, October 4 zinga a len avanga chhiatna leh harsatna thleng hrang hrangah chhawmdawl leh seng fel, inzawn hna thawh mek zel a ni. Hriat theih chinah mitthi, ruang hmuh tawh hi 40 a tling tawh a, kar hnih zet a ral hnuah pawh mi 76 te chu an awmna chin hriat a la ni lo niin thuneitute chuan an sawi.

Mitthi ruang tam zawk hi Pakyong-ah hmuh a ni a, Sikkim State Disaster Management Authority (SSDMA) chuan Pakyong district-a ruang hmuh zinga 26-te chu civil mi ruang a nih thu leh, ruang 11-te chu sipai ruang a nih thu an sawi. Ruang pariat hi Gangtok-ah hmuh a ni a, Mangan-ah ruang pali hmuh ni bawkin, Namchi-ah ruang pahnih hmuh a ni. Ruang eng emaw zat hi ṭhenawm state, West Bengal-ah hmuh a ni bawk a, heng ruangte hi Teesta luiin a len thlak ni ngeia hriat a ni. Mi bo 76 zinga 28 hi Pakyong mi an ni a, Gangtok aṭangin mi 23 la bo bawkin, Namchi leh Mangan aṭangin mi 20 te awmna chin hriat a la ni lo bawk. Tun dinhmunah relief camp hi 20 siam a ni a, heng hmunahte hian mi 2,080 an awm mek a ni.

Sikkim-ah hian 2011 census-a chhinchhiah danin mihring nuai 6.10 vel an cheng a, India state zinga mihring chen tlemna ber a ni. Teesta tuilian avang hian mihring 88,000 chuang chuan harsatna an tawh phah niin thuneitute chuan an sawi bawk.