Nagaland : November thla ral hmaa NH-02 siam zo turin NHIDCL hriattir

Nagaland-a NGO, Southern Angami Youth Organization (SAYO) chuan National Highways and Infrastructure Development Corporation Ltd. (NHIDCL) general manager hnenah hriattirna lehkha pein, Manipur leh Nagaland zawmtu; NH-02 thawm ṭhat leh siam hna an thawh mek chu November 25 hmaa zo turin an hrilh.

SAYO president Metkhrielie Mejura leh general secretary Metevizo Sophie te chuan NH-02 siam hna thawh zawh theih loh chungchangah hriattirna lehkha pek bak an tih theih loh thu sawiin, NHIDCL hnathawh zawh har chuan Angami chhim lam (Phesama - Khuzama khua) khaw mipuite tan veivahna leh chetvelna a tibuai nasa hle tih an sawi."He National Highway hi Angami chhim lam mipuite kawngpui rin leh hman nasat ber a ni a, helai bial vela khualzinte tlawh ṭhin hmun panna kawng pawimawh tak a ni bawk. Ni 10 awh tur 2023 Hornbill festival December-a neih tur pawh hian ram chhung leh pawn lam thlengin khualzin a hip leh dawn a ni tih pawh hi hriat tel a ngai," an ti.

Kawng chhia hian mipui tan harsatna a thlen nasat thu pawh pawh NHIDCL hi an hrilh fo a, mahse tun thlengin hmalakna a la awm lo tih an sawi. Hei vang hian NHIDCL hnena lehkha theh luh mai hi kawng awmchhun ni tawha an hriat thu leh, a, rokhawlhna leh chhuanlam awm loa November 25 hma ngeia kawng siam ṭhat hna hi zo tura duh thu an hrilh.