North East India Festival Vietnam-in thleng dawn

North East India Festival (NEIF) vawi 3-na tur chu October 27-29 chhung hian Vietnam-ah nghah a ni dawn a, a hawnna hi September 23rd Park, Ho Chi Minh City District 1-ah neih a ni ang. Festival hian ni thum a awh dawn a, cultural leh exhibition show bakah, B2B meeting-te neih a ni bawk ang.

Ho Chi Minh City-a Consul General of India, Madan Mohan Sethi chuan NEIF hi a hawng dawn a, India atangin chief minister, union minister, leh sumdawng eng emaw zat an kal beisei a ni.

Festival chhung hian Ministry of Development of North Eastern Region (DoNER) Secretary, Chanchal Kumar kaihhruaina hnuaiah Tourism atan bika B2B meeting neih a ni dawn a, NER-a Invest India in-charge, Dr. Geetima Das Krishna hoin insumdawn tawnna chungchanga B2B meeting neih a ni bawk ang. Meeting-ah hian North East dinhmun thlirna leh North East-a khualzin hipna kawngte, investment siamna tur te sawiho a ni dawn.

NEIF chief organiser, Shyamkanu Mahanta chuan,"North East-a state tin sorkarte thlawpna kan dawng ṭha em em a, assembly inthlan tur avangin tel vek harsa mah se, Southeast Asia rama India festival lian tak pakhat huaihawt a ni tur hi an lawm thu min hrilh a ni. NEIF hian India leh Southeast Asia ramte inkara inlaichinna a tiṭha zual hle a, India sorkarin min thlawp ṭhat vang a ni bawk. Northeast India theihna leh danglamna pho chhuaka, khawvel hmuha tarlang tur hian seminar tam tak kan lo nei tawh a, tunah chuan hna kan thawh a, kan beiseite a taka chantir tura kan chet chhuah a ngai tawh thung a ni," tiin a sawi.

Exhibition chi hrang hrang neih a ni dawn a, India ram hmun mawi tak takte pho lanna 'Incredible India Exhibition' pawh neih a ni ang. North East-a state hrang hrangte hnam lam pawh en theih a ni ang. Heng bakah hian Nagaland-a Task Force for Music and Arts (TaFMA), The Fantastic Company, Bright Lights, Imnainla Jamir, Trance Effect, Kl Pamei leh Meghalaya band lar, Summersalt te pawh an perform dawn bawk a ni.