Kalikho Pul kaihhruai MLA 32 ten AP-ah sorkar siam tum

Arunachal Pradesh-a Congress hruaitu hel, Kalikho Pul kaihhruai MLA 32 bakah opposition leader Tamiyo Taga-te chuan February 15 khan Governor JP Rajkhowa chu a chenna Raj Bhavan-ah hmuin, Arunachal Pradesh-ah sorkarna an siam theih thu an hrilh.

Kalikho Pul hi Congress MLA 18 ten an zui a, Governor hnenah memorandum thehlutin sorkarna an siam theih thu an thlen. Congress MLA Chowna Mein, T Mein, Zingnu Namchoom, Wangki Lowang leh Honchu Ngandam chuan Kalikho Pul an thlawp thu hi ziakin Governor hnenah hian an thlen bawk. An lehkhaah chuan Kalikho Pul hi council of minister hruai turin an thlawp tak zet a, president rule a zawh veleh sorkarna chelh turin an duh tih an tarlang.

Tamiyo Taga leh a thawhpui, BJP party MLA 10 te chuan Governor hnenah hian Kalikho Pul an thlawp tlat thu an thlen ve bawk. An lehkhaah chuan, Kalikho Pul chu BJP MLA ten an thlawp tlat thu tarlangin, Article 356 behchhana president rule-a Arunachal Pradesh puan a ni chu hlip thuai tur leh sorkarna siam tura Kalikho Pul sawm turin Governor chu an ngen a ni. BJP MLA aiawh Tamiyo Taga chuan Kalikho Pul hnuaia Congress sorkar din chu an thlawp tih sawiin, BJP sorkar siam an tum hran lo tih a sawi.

Independent MLA pahnih Paknga Bage leh Tsering Tashi pawhin Pul hi sorkarna siam turin an thlawp thu an thlen bawk.

Kalikho Pul leh amah thlawptu MLA rualte hnenah hian Governor chuan, an thil phut chu President of India hnena a thlen nghal tur thu hrilhin, tihfel ngai leh ṭul dangte chu mithiam rawn chunga a bawhzui tur thu a lo hrilh a ni. President rule hlih a nih dawn leh dawn loh chu President thuneihna a nih thu sawiin, AP-a assembly rorelna tihnun pawh a kuta a awm thu Governor hian a sawi.

Governor chuan MLA 32 te chu anmahni thlang tlingtu mipuite hmakhua ngaiin state chhungah awm turin a ngen.