Rahul Gandhi-an Assam-ah Campaign a ṭan

17th February, 2016

State Assembly inthlan hmachhawn mai tur Assam lam hawiin political party-ten ke an chhep ṭan a, Thawhṭanni khan Congress vice president Rahul Gandhi chuan an party tana campaign hawng ṭanin, RSS leh PM Modi te a bei nasa hle. Rahul chuan BJP chu Bihar inthlanpuia an chetchhiat ang chiah kha Assam ah pawh hian an tawng dawn niin a sawi.

Rahul-a hian Assam khaw-chhak lam Gohpur, Bihpuri leh Titabor-a vantlang inkhawmah thu a sawi a, AICC leader C P Joshi, Assam Chief Minister Tarun Gogoi leh senior party lea-der ten Rahul hi an ṭawiawm a ni.

Rahul chuan Modi chu milian leh hausa te chauh ngai-pawimawh a, mi retheite hlamchhiahah puhin, RSS chu ram hmangaihtu pasalṭha anga inchhalah a puh bawk. RSS hian inlungrual lohna chi an tuh nia a hriat thu a sawi.

"Tunlai hian RSS chetdan sawisel chu ram phatsantu anga puh an ni. RSS hi enge an nih? Ram tana thawk turin eng phalna nge an neih? Hnampa Mahatma Gandhi-a awma ngen mu pathum thuntu te kha an ni lo em ni?" tiin Rahul Gandhi chuan RSS a sawt nasa hle.

"RSS chuan India ramah nunphung pakhat chauh a awm tur a ni an ti. A nih chuan
ṭawng hrang hrang, mize hrang, nunphung, sakhua leh hnam hrangte awma ram hausa India chu khawnge a awm tak ang? RSS hian mimal dikna chanvo, an pian chhuah aṭanga an dawn chu tihbo an tum a ni. RSS duhdanin nunphung pakhat zawm tlan chu awm ta se Independence chu mipui tan awmzia a awm dawn em ni?" tiin Rahul hian RSS ho chetzia chu a sel bawk.

" Bihar mipuiten RSS lakah thuchah awmze nei an hlan tawh a, BJP chuan inthlana chakna chan duh vangin hnam ṭhenhranna thu an aupui bawk. Bihar ang chiah khan Assam-ah pawh BJP hi an awm ang, hnam hrang hrangte inpawhtlang taka chenna a nih vangin' tiin Rahul chuan a sawi. Tarun Gogoi-an kum 15 zet Assam rama muanna a thlen chu fakin, hmasawnna kawng an zawh mek tih a sawi.

Rahul chuan, "Modi hian loneitu retheite nen thlalak ho a duh lo a, mi hausa sumdawng lian ho bulah chauh a duh a ni. Vawiin hun a sawi duh ngai lo a, naktuk emaw nakin huna hmachhawp chauh a sawi duh a ni. Ram pawna sum chhep-relh pawh laklet a tiam a, a tihlawh-tling chuang lo a ni' a ti.