Cabinet-in AP-a President Rule tihtawp rawt

Union Cabinet chuan Arunachal Pradesh-a President Rule puan chu tihtawp an rawt a, an rawtna hi President-in a pawm chuan political party-ten sorkar siam turin hma an la ṭan thei dawn a ni.

Home Ministry hnena Arunachal Pradesh Governor JP Rajkhowa-an state chhung politics dinhmun chungchanga report a thehluh thar ber behchhanin cabinet hian President Rule tihtawp hi an rawt a ni.

Governor hian a report thehluhah party ṭhenkhatin sorkarna an siam theih thu an hrilh chungchang pawh a tarlang tel.

Thawhṭanni khan Congress MLA hel, Kalikho Pul kaihhruai MLA 31-te chuan Governor hi hmuin, sorkar siam tura member an ngah tawk thu an hrilh. Congress hruaitu hi Congress MLA hel 19 bakah BJP MLA 11 leh independent mmber pahnihten an ṭawiawm.

Kalikho Pul-an sorkar an siam thei dawn tih Governor hnena a thlen thu an hriat veleh, Congress party chu Supreme Court-ah kal nghalin, an state-a President Rule puan chu chhunzawm zel tur leh, sorkar thar siam tumna chu dang turin an ngen. Mahse Supreme Court hian sorkar lakluh khapna hi a siam duh lo a ni.

Pul-a kaihhruai Congress MLA helte avang hian hun rei tak chhung chu rorellai, Congress party hi an buai tawh a ni. MLA helte hian Chief Minister
aṭangin Nabam Tuki chu paihthlak a, a aiah Pul-a dah hi an duh. Rorellai party buaina avang hian kumin January 26 khan Arunachal Pradesh chu President's Rule-a dah a nih phah ta a ni.

Legislative Assembly member 60 awmna, Arunachal Pradesh-ah hian Chief Minister aṭanga paihthlak tak, Nabam Tuki hian thlawptu member 26 a la nei.

Kum 2011 assembly inthlanah khan Congress party hi hneh taka thlan tlin niin, member 47 a nei. Mahse party MLA 47 zinga 21-te chuan Tuki hi thlak phutin an hel zui a ni. Nabam Tuki kaihhruai sorkar paihthlak a nih theih nan Congress MLA helte hi BJP leh independent MLA-te chuan an thlawp a ni.