Nagaland police-ten lottery scam laka fimkhur turin chah

Nagaland police chuan state mipuite chu lottery hmanga inbumna laka fimkhur turin an chah. Inbumna thubuai eng emaw zat lut chu an chhui mek thu an sawi bawk.

SP (Crime) M Tungoe chuan lottery hmanga inbumna hi a thleng fo tih sawiin, e-mail, phone call leh text message hmangin sum tam tham tak an dawng dawn a, fee pek a ngai tihte an thawn ṭhin tih a sawi. "Message dawngtuten sum hi an lo pe hman a nih chuan lak let leh a harsa tawh hle ṭhin a ni" tiin, mipuite chu ticket an lei phawt loh chuan lottery an man thei dawn lo tih hrechiang turin a chah.

Tungoe chuan lottery company rintlakte chuan lawmman an man
aṭangin fee, tax, bank leh courier charge-te an paihsak dawn a, a hmain fee lo pe lawk tura an dil ngai loh thu a sawi bawk. Hetianga inbumna message an dawng a nih chuan police-te hnenah hriattir ṭhin turin mipute chu an chah a ni.