AP media-ten Statehood Day an boycott dawn

Arunachal Pradesh-a media club hrang hrang- Arunachal Press Club (APC), Arunachal Pradesh Union of Working Journalists (APUWJ) leh Arunachal Electronic Media Association (AEMA) te chuan vawi tam tak an ngen hnu pawha state sorkarin kum li zet bill a tihkhawtlai sak avangin Statehood Day lawmna neih tur chu boycott an tum.

APC President Chopa Cheda chuan thuchhuah siamin, "Bill tihkhawtlaite hi sorkarin February 19 thlenga a tihfel loh chuan press body-te chuan Statehood Day lawmna tur leh a kaihhnawih thil dang buatsaih turte chu an boycott vek dawn a ni" a ti.

Kum 2015, November 2 khan meeting neiin, media aiawhte chuan hetihlaia Chief Minister Nabam Tuki pawh an hmu a, Tuki hian kar khat chhungin bill tang zinga 15% lo chinfel sak a tiam thu Cheda chuan sawi. Mahse tun thlengin sum hi an la hmu lo tih a sawi. Hei bakah hian bill tang dang 85% pawh thla khat chhunga chingfel vek turin CM hlui hian official-te pawh a hrilh niin a sawi.

Chief Secretary, IPR Secretary leh Director-te pawh vawi tam tak an hmu tawh a, anni pawhin an file hi chinfel sak thuai an lo tiam zel chungin, engmah a hlawhtlinna an la hmu lo niin Cheda chuan a tarlang. Finance Department-a Principal Secretary leh Secretary-te chuan media pawlte chu chhaih buai fo nia sawiin, media ho file buaipuitu Finance Secretary chuan media aiawhte chu a lo hmu duh lo a ni, a ti.

Hei vang hian Principal Secretary leh Secretary bakah, IPR Director-te hi ban turin an phut bawk.