Mobile internet hman theih a ni thuai dawn : Manipur CM

Manipur chief minister N. Biren Singh chuan cabinet meeting neih zawha Ukhrul district mini secretariat-a vantlang hmaa thu a sawinaah Manipur-ah mobile internet hman leh theih a nih thuai tur thu a sawi.

Singh chuan mipui harsatna chu a hriatthiam thu sawiin,"Remchanga laa buaina siam tum mi tute'n emaw an veh reng avangin state sorkar chuan loh theih lohin internet kan tihtawp a ngai ṭhin. Chu chu kan dinhmun ni mah se, mobile internet hi a rang lama hawn leh a ni ang tih erawh ka tiam duh che u," a ti.

Ukhrul-a hun a hmannaah CM hian project chi hrang hrang thawhna tur lungphum a phum bakah, Ukhrul leh Kamjong district tana scheme Rs. vbc 64.38 man a tlangzarh bawk a ni. Mipuite duhdan ang ngeia Ukhrul hmasawnna tura sorkarin ngaihtuahna a sen thu sawiin, district capital-a mihring an pun chhoh zel avangin Sirarakhong khaw bula Ukhrul township siam pawh a ṭul maithei, tiin a sawi bawk. "Ukhrul hi Imphal tih lohah chuan khaw pawimawh tak a ni a, harsatna awm erawh tui lakna lamah a ni. He harsatna su kiang tur hian tui lakna tur siam nan Rs. vbc 6 ruahman a ni a, tuikhuah siamna tur atan pawh Rs. vbc 180-200 dah a ni bawk," tiin, Ukhrul khawtlang mipuite leh hruaitute chu ruihhlo dona kawnga state sorkar an thlawp ṭhat avangin lawmthu a hrilh bawk.