Meghalaya cabinet-in street vendor scheme 2023 pawm

Meghalaya cabinet chuan Nilaini khan street vendor scheme 2023 draft chu la zir chian belh tur leh siam ṭhat tlem neiin an pawm thu an puang. He scheme hi 2014-a Central Act, Street vendors protection of livelihood and regulation of street vending act 2014 tia hriat hnuaia awm a ni a, he act-a dan leh hraite hi state sorkarin 2022 khan a duang a ni.

Heng dante siamna atan hian Meghalaya street vendors scheme 2023 hi ruahman a ni a, he scheme draft hi cabinet hian a pawm ta a ni. He scheme kaltlang hian sorkar chuan street vendor hmanga eizawngte'n hlawkna tam zawk an tel theihna atan leh, dan leh thupek zawm bakah hmun thawl zawk siamsak leh kawng kalte himna ngaihtuah tel chu a tum ber a ni, an ti.

Cabinet Minister, Paul Lyngdoh chuan tun hnaia Police Bazar Thana road-a kangmei chhuakah pawh street vendor-te'n kangṭhelhtute hnathawhna tur nasa taka an tihkhawtlai thu sawiin, an scheme pawm tak chuan town vending committee-te'n dan phal anga hawker-te chhinchhiah a tum thu a sawi bawk. Criteria hrang hrang siamah hawker-te chuan Election Commission siam EPIC (voter ID) an nei tur a ni a, Meghalaya-a kum thum tal cheng tawh tih hriatna certificate te, an thil zawrhna hmuna thla ruk aia rei zuar tawh leh Shillong Municipal Board pawn lam mite tan trade license nung ngei an neih a ngai bawk.

State sorkar chuan he dan hman ṭan hma hian thla hnih vel a la ngai dawn tih sawiin,hetih chhung hian registration tihna tur leh thil zawrh phalna hmun leh phal lohna hmunte pawh an duang dawn a ni. Hawker-te tana inzawrh phalna hmun turte chu master plan siam phawt a nih tur thu Lyngdoh chuan a sawi a, criteria mumal tak an siam tur thu leh, traffic leh mipui chetvelna dal lo tur leh dan leh thupek kenkawhna tibuai lo tura ruahmanna siam a nih tur thu a sawi. Meghalaya-ah hian hawker 3,000 chuang an awm mek a ni.