Telangana inthlan neih tur avangin Hamas-te chet dan dem duh loah Congress puh

Assam chief minister Himanta Biswa Sarma chuan Rahul Gandhi duh danin Congress hian Hamsa-te chet dan an dem duh lo a, Palestine an thlawp zawk a, hei hi Telangana inthlan lo awm tur vang a ni tiin a puh. CM chuan hmanni maia an din, INDIA-a telte pawhin inpumkhatna an nei lo a, mipuite bum nana din mai a ni, tiin a sawi bawk.

Sarma chuan,"Congress Working Committe (CWC) meeting pawh hmanni maiah an nei a, Israel leh Hamas indona chungchang pawh an sawi. Meeting-a kal zawng zawngte pawhin Hamas-te chet dan demna thu an chhuah a ṭul thu an sawi laiin, Telangana inthlan a hnaih avangin Palestine thlawp a ṭul thu Rahul Gandhi-a'n a sawi niin anmahni chhung lam ṭawngkam aṭangin ka hria a ni," tiin, CWC resolution siamah pawh Hamas-te chungchang hi engmah a chuang lo, a ti. Congress hian mi tihlawm politics an khelh avangin firfiaka chetna hi an dem ngam lo a ni tiin,"Hamas-te ngei pawh hian India mipui ṭhenkhatin Israel an dem ang hian an dem miah lo. Hamas hian an tihsual hi an hriat vang a ni. Hamas ngei pawhin mi an ruk chu sual a ni tih an hria," tiin a tarlang bawk.