Jadavpur University-ah Kashmir, Manipur leh Nagaland atan zalenna phut

Jadavpur University, Kolkata-a Afzal Guru ṭantute an aurual hnuah, Nilaini khan campus-ah hian Kashmir, Nagaland leh Manipur tan zalenna pek ni rawh se tiin thuziak an tar chhuak.

Vice chancellor Suranjan Das chuan parliament beihnaa inhnamhnawih Afzal Guru ṭanna lam hawia aurualte chu pawi-khawihna thil a ni tiin, an chunga action lak a nih theih nan police a ko hial a ni.

Nilainia poster tartute hi anmahni chuan 'kulmuk pawl' tiin an invuah a, poster pakhatah chuan 'Enge kan duh ber ? Zalenna, Kashmir tan zalenna/ Manipur tan zalenna/ Nagaland tan zalenna' tihte an ziak a ni. Poster ṭhenkhatah hian kum 1993 a Mumbai-a bomb tipuaktua puha thiam loh chantir, Yakub Memon leh Afzal Guru ṭanna lam hawi an ziak bawk. An pahnih hian khaihlum an ni tawh.

"Gujarat-a mi tam tak suattu, Afzal Guru leh Yakub Memon-a khaihlumtute hi ram pasalṭha an nih laia Kashmir zirlai zalenna tura bei mekte ram hmelma an nih si chuan kei ni pawh ram hmelma nih mai kan duh e" tihte an tar.

Poster pakhatah chuan Mao Tse Tung-a thusawi, " Awpbettu laka zalenna neih hi kan duh ber a ni" tih ziak an tarlang bawk.

Zirlai ṭhenkhat chuan kawngzawh huaihawtin, "roreltu tawrawt Modi" tia aurualin, Jawaharlal Nehru University Students' Union president Kanhaiya Kumar man a ni chu an dem thu an sawi bawk.

Kulmuk pawl hruaitu pakhat Zubi Saha chuan, "Inlakhran duhna thusawi niah ka ngai lo. India khua leh tui ka nih avangin freedom of expression ka nei a. Kashmir mipuite hi nitin tihduhdah an ni. Zalenna an duh chuan ka thlawp a ni. Hei hi ram phatsanna ah ka ngai hran lo" tiin a sawi.

Hemi hnu hian zirlai pawl dang chu India flag vai chungin Jadavpur University campus-ah hian kawng an zawh ve thung. Heng mite hi hmun khatah ṭhu khawmin, ram phatsana ram ṭhendarhna thu sawitute chu hrem ngei an phut thu an sawi . Heng mite hian zirlai ṭhenkhatin Afzal Guru leh Yakub Memon thlawpna thuziak an tar leh Kashmir, Nagaland, Manipur zalenna pek an duh thu an tarte chu an pawtthler a ni.

Vice chancellor Suranjan Das chuan mimal kaihhruaia kawngzawh hi neih a ni, Students union in phalna lain an kaihhruai lo, a ti.

BJP chuan Jadavpur University-a India duhlohna thu aurualte chu vuak hlek an ngai a ni, an ti. An chetdan chu demawm tak, zirlai ni chunga ram dona thu sawi an ni a, an phu tawk hremna pek ni ngei se, chuti a nih loh chuan ram hmangaihna thu tak tak an hre ngai lo ang tiin BJP national secretary Rahul Sinha chuan zirlaite hi a demthu a sawi.

Left party zirlai pawl, Students Federation of India te chuan kawngzawh huaihawt ve lehin, JNU-a zirlai mante chu an hotu Kanhaiya Kumar tela chhuah vek an phut.