AP Chief Minister thar Kalikho Pul la lut

Arunachal Pradesh-a Congress party hruaitu hel, Kalikho Pul chu Inrinni khan Chief Minister 9-na ni turin Governor KP Rajkhowa'n Itanagar-a Raj Bhawan-ah rinawmna thu tiam tirin a la lut. Pul hi chief minister a nih theih nan BJP MLA 11 leh independent MLA pahnih ten an thlawp a ni.

Arunachal Pradesh finance leh health minister hlui ni bawk, kum 47-a upa Pul hi Hayuliang assembly constituency aṭangin Congress ticket-a thlan tlin a ni. Mahse Chief Minister atana Nabam Tuki dah chu duh loin, rorellai Congress MLA eng emaw zat chu Pul kaihhruai hian an hel zui a ni. Nikum December 17 khan Congress MLA helte leh anmahnih thlawptu, BJP leh independent MLA-te chuan auditorium-ah session neiin, Pul hi hruaitu atan an thlang.

He session neih hi kha tih hun laia chief minister Nabam Tuki thlawptu te chuan duh loin an boycott a ni. Heng te avang hian rorellai party chhungah buaina hrang hrang a awm chho a, Governor JP Rajkhowa-a rawtna angain President's Rule-ah Arunachal Pradesh chu puan a ni ta a ni.

President's Rule-a dah a nih hnu hhian sorkar thar din tum hma an la reng a, Nabam Tuki chuan Congress MLA helten BJP nena thawkduna sorkar thar siam an tum chu dang turin Supreme Court-ah a ngen a, hei bakah a kaihhruai party chu assembly-ah fiahna paltlang phalsak turin a ngen bawk. Mahse a ngennate hi Supreme Court chuan a pawmsak lo.

State Congress president Padi Richo pawhin Governor JP Rajkhowa-a hnenah memorandum thehlutin Congress hruaitute inkarah inrem lohna a awm avangin sorkarna siam lo turin ngenna a thlen. Nabam Tuki chu mipuiten dan ang thlapin CLP hruaitu atan May 18, 2014 khan an lo thlang tling tawh a,hei hi tun thlengin a la danglam lo a ni, tiin memorandumah chuan an ziak. Congress party chuan Kalikho Pul chu CLP hruaitu a ni lo a, a kaihhruaina hnuaia Congress party din chu pawm theih a ni lo, an ti.

Supreme Court chuan Arunachal Pradesh-ah hian sorkar thar siam turin hma a la reng a, sorkar thar a din theih nan han kar kalta Zirtawpni khan President's Rule chu a hlip a, Inrinni khan sorkar thar chu lakluh a ni ta a ni.

Prime Minister Narendra Modi pawhin Arunachal Pradesh-a sorkar thar a ding leh thei ta chu lawmawm a tih thu sawiin, duhsakna a hlan. Modi chuan a Twitter-ah," State tan hian ka tawngtai a, kum lo la kal turah hmasawnna a thlen ngei ka duhsak a ni" tiin a ziak.

Chief Minister atana Kalikho Pul lakluh a nih tur thu puan a nih aṭang khan Congress hruaitu mi eng emaw zat chuan President Pranab Mukherjee chu an hmu nghal. He hunah hian hmarchhak atangin Congress MP Vincent Pala, Wansuk Syiem leh Thokchom Meinya (Manipur), Meghalaya Chief Minister Mukul Sangma, Arunachal Pradesh Chief Minister hlui Nabam Tuki leh V Narayanasamyte an tel a ni.

Hmarchhak Congress hruaitute chuan," India rama Governor tura BJP sorkar-in a ruatte chu Rashtriya Swayamsevak Sangh (RSS) mi leh sa an ni zel a, hei hi induhsakna uchuak a ni" an ti. Meghalaya Chief Minster chuan,"Arunachal Pradesh buaina chu thuneitu sang aṭanga thuneihna hman dik tawk loh vang a ni a, hetiang thil hi a thleng nawn tawh tur a ni lo" tiin an ṭhenawm state-in Governor an hrawn mek chungchang a sawi.

He tih lai hian, Inrinni vek khan Arunachal Pradesh Chief Minister hlui Nabam Tuki chuan an state-a sorkar laipui thiltih dan chu sawiselin,"RSS leh BJP party te hian hmarchhak state-a Congress rorelna reng reng chu ṭhiah vek an duh a ni" a ti. Congress party MLA te inkara buaina awm pawh BJP leh RSS te thiltih a ni tiin, Governor J P Rajkhowa leh Union Minister Kiren Rijiju te chungah a lawm loh thu a sawi.

Nabam Tuki chuan,"Kan sorkar kha ṭhiahna chhan tur pakhat mah a awm lo, dan leh thupek kenkawh chhungchang ah pawh harsatna kan tawklo niin Prime Minister chuan a sawi a ni" a ti. Congress MP Takam Sanjay pawhin, Governor Rajkhowa chu an state aṭanga sawn chhuak turin a ngen a, "Mipui rorelna ramah kan awm a, dan hnuaia leng vek kan ni, Rajkhowa'n thu neihna a hman dan hi dan kalh a ni" tiin a sawi ve bawk. Hmarchhak bialah hian Manipur, Assam, Meghalaya leh Mizoram-ah te Congress party-in sorkarna an chang mek a ni.

Arunachal Pradesh-a Congress MLA lungawilo te chu ban tur hian Supreme Court-ah thlen a lo ni tawh bawk a, pawm sak an ni lo thung. BJP leh Independent te nen ṭangkawpin Arunachal Pradesh-ah sorkar an din ta zawk a ni.