ONGC-in Tripura-ah Rs vbch 5,050 invest dawn

Oil and Natural Gas Corporation (ONGC) chuan Tripura state-ah oil zawn chhuah hna nasa zawka thawh tumin, cheng vaibelchhe 5,050 invest a tum.

ONGC Executive Director S. C. Soni chuan kum 2020 thlenga oil zawn hna thawhna atan cheng vaibelchhe 5,050 invest an tum chu ONGC board pawhin a pawmpui tawh thu a sawi a, he ruahmanna hnuaiah hian tuna Tripura gas field aṭanga ni khata standard cubic meter maktaduai 4.1 an lakchhuah chu maktaduai 5.1 ah tal tihpun theih an beisei tih a sawi.

Soni chuan Tripura-ah hian ONGC chuan gas field 11 a hmuchhuak tawh a, field dang pasarih pawh buaipui mek a ni, a ti. Investment thar an siam tur hmang hian hmun 153-ah oil zawngin lei an verh leh thei dawn tih a sawi bawk.

"Tripura aṭanga gas sicmachhuah tihpun a nih theih nan hian Sonamura, Gojalia leh Konaban-a GCS (Gas Collection Centre) te chu thuam ṭhat an ni dawn a, gas pipe pawh km 900 vela thuiah phum a ni ang" tiin Soni chuan a sawi.

ONGC hian Tripura-ah hian gas zawngin hmun 200 velah lei an verh tawh a, an lei verh zinga 50% aia tamah oil hi an hmu a ni. State chhim lamah mega commercial power project kalpuiiin, ONGC Tripura Power Company (OTPC) pawh a lo din tawh bawk. Palatana-a cheng vaibelchhe 10,000 senga 726MW gas-based thermal power project a siam chu India ram chhunga ONGC commercial power project hmasa ber a ni.

Rajasthan-a Chambal Fertilisers and Chemicals Limited leh Tripura sorkar nen thawk hoin, ONGC hian Tripura hmarlamah cheng vaibelchhe 5,000 sengin fertiliser plant din a tum mek bawk.