Tripura Congress ngaihdan phir

Congress party-in West Bengal assembly inthlan neih tura Left Party thawhpui a tum chungchangah Tripura Congress party hruaitute ngaihdan a phir.

Tripura Congress president leh hruaitu ṭhenkhatte chuan party dang thawhpui chung changah central lama an hruaitute thutlukna ang chu an pawm tur thu an sawi a, mahse assembly-a eptu hruaitu Sudip Roy Barman chuan Left party thawhpui a duh loh thu a sawi thung.

Barman chuan a pa, chief minister hlui Samir Ranjan Barman chuan Left party nena thawhdun hi a duh lo bur tih sawiin, "CPI-M chu policy mumal nei lo party a ni a, innghahna pawh an nei lo. Mipuiten an paihthla tawh a, tunah Congress party rinchhana thuneihna chan leh a tum a ni" a ti. Sudip Roy hian Congress president Sonia Gandhi hnenah pawh lehkha thawnin, Left Party thawhpui a duh loh thu hi a thlen a ni.

Sudip Roy Barman chuan, "West Bengal-a CPI-M in kum 35 thuneihna a chan chhung khan Congress hruaitu leh worker 50,000 zet chu khawngaihna nei loin an tihlum tih kan theihnghilh tur a ni lo" a ti. CPI-M chu Rajiv Gandhi leh Indira Gandhi-te tihhmingchhiat tum rengtu a ni tiin, ram hmangaihna aiin an pawl hmangaihna chu an dah sang zawk a ni, a ti.