Tuki-an AP sorkar thar a sawisel

Arunachal Pradesh chief minister kal chhuak ta Nabam Tuki chuan, AP sorkar thar chu sawiselin, "Kalikho Pul-a leh a thurualpui ten sorkar thar an din dan chu diklo leh India danpui kalh a ni" a ti. He mi chungchangah hian Prime Minister Narendra Modi pawh na takin a sawisel.

Tuki chuan BJP kaihhruai sorkar laipui chuan a kaihhruai laia Arunachal Pradesh sorkar chu diklo taka beiin, sorkar chu ṭhiah sakin President's Rule-ah a puang a ni, a ti. Tuki chuan,"Engvangin nge BJP sorkarna state Madhya Pradesh, Rajasthan leh Maharashtra-ah te President's Rule puan a nih ve loh? Sorkar hna lak dan dik lo avangin an buai em em a, lo neitu intihlum tam tak an awm a ni lawm ni"? tiin Arunachal Pradesh-a President's Rule puan a nih bik chhan chu party inbeihna-ah a ngai tih a sawi.

Governor J.P. Rajkhowa chungchang pawh sawi chhunzawmin,"Governor chuan party mal lian ber chu sorkarna siam turin a sawm tur a ni a, mahse he thilah hi chuan a thuneihna a hmang dik lo a,court-ah thu ngaihtuah mek a ni" a ti. Chief minister hlui chuan an state Governor J.P. Rajkhowa chu Governor atanga ban turin a phut a, democracy palzutin, India danpui chu zawm a hnekin a hmang sualtu a ni, politics hamṭhatna chiah a ngaihtuah a ni, a ti.

AP-a President's Rule puan chu tihtawp a nih hnuah, kar kalta Inrinni khan Congress party hel hruaitu Kalikho Pul chu Arunachal Pradesh Chief Minister 9-na ni turin Governor J.P. Rajkhowa'n rinawmna thu tiam tirin a la lut a ni.

Pul hian Congress party MLA hel 19, BJP MLA 11 leh Independent MLA 2 te nen thawkhoin sorkar thar a siam dawn a ni.