AP CM tharin emergency meeting ko

Arunachal Pradesh Chief Minister thar, Kalikho Pul chuan CM atana lakluh a nih hnuin a office-ah bureaucrat-te emegency meeting a neihpui nghal a, state chhung dinhmunte a sawipui.

Meeting-ah hian Chief Secretary Ramesh Negi, Principal Secretary (Home) Dharmendra Shar-ma, Principal Secretary (Finance) Satya Gopal Sinha, DGP S Nithiyanandam, Commissioner to CM Hage Kojeen, Secretary personnel, DC leh SP-te an tel a, CM chuan state chhungah dan leh thupek palzut a nih lohna tura khauh taka hma la turin a hriattir.

CM thar chuan state chhungah dan palzut an awm a nih chuan an ngaizam mai dawn lo tih a sawi a, "Dan leh thupek kenkawh te, eirukna umbo te, sorkar sum awmze nei taka hman leh kawng hrang hranga hmasawnna a thlen theihna tura langtlang sorkar siam chu kan tum ber a ni" a ti. An state chu dinhmun sang zawka chawikan a nih theihna tura thawkhona ṭha nei turin a sawm nghal bawk. Health leh eduction sector-te chu a ngaih pawimawh tur thu a sawi.

Arunachal Pradesh Chief Minister thar, Kalikho Pul (49) hi kum ruk mi a nih laiin a pain a thihsan a, kum 13 a nihin a nu a thi a, a niin a enkawl zui a ni. Hemi hnu hian carpentry zirin, furniture a zuar a, zan lamah chowkidar hna thawkin thla khatah Rs 212 a hlawh ṭhin. Zan lamah school kal chhunzawmin amahin a inchawm a ni. Indira Gandhi Government College, Tezu aṭangin a graduate a ni.

Kum 2003 - 2007 khan Chief Minister hlui Gegong Apang-a kaihhruai sorkarah Finance minister hna a lo chelh tawh a ni.