North-East railways hnuaiah rel thar pahnih vai liam

Rel hmanga ram chhung hmun dang leh hmarchhak bial thlun zawm ṭhat tuma hmalak mekna hnuaiah, North-East Railways chuan rel thar pahnih tlangzarhin, rel kawng pahnih an extend bawk.

Railway official-te chuan rel kawng pakhat zawk hi Silchar thleng extend a nih thu leh pakhat hi Agartala thleng extend a nih thu an paung a, rel thar Guwahati aṭanga chhuak hi Assam chief minister, Himanta Biswa Sarma chuan a vai liam a ni. Agartala aṭanga chhuak rel thar hi Tripura chief minister, Dr. Manik Saha chuan a vai liam ve bawk.

Barak valley mipuite'n hun rei tak ata tawh an duhthusam ni ṭhin chu tihhlawhtlin a nih tak thu CM Sarma chuan a sawi a, rel thar hi Guwahati station aṭanga vai liam niin, Guwahati-Dullabcherra-Guwahati a tlan dawn a ni. Guwahati-a rel thar vai liamnaah hian Chetan Kumar Shrivastava, Northeast Frontier Railway general manager leh railway senior official eng emaw zatin an ṭawiawm. He rel hi kar khatah vawi thum a tlan ṭhin dawn a, Thawhṭanni, Nilaini leh Inrinniah te a tlan ṭhin ang.

Tripura chief minister, Dr. Manik Saha pawhin Agartla thlenga siam belh rel kawng thar a hawng bawk. Lakmanya Tilak Terminus- Kamakhya-Lokmanya Tilak Terminus inkar tlan ṭhin rel chu Agartala thleng a tlan tawh ang. Hei bakah hian rel thar DEMU rel, Agartala-Sabroom-Agartala kal tur chu Agartala railway station aṭangin a vai liam bawk a ni. Agartala-a rel thar vai liamnaa hun hmannaah hian union minister of state for social justice and empowerment, Pratima Bhoumik leh Tripura sorkara minister hrang hrangte an tel.