Meghalaya Congress-in BJP tih loh an thawhpui theih vek thu sawi

Meghalaya Pradesh Congress Committee (MPCC) hruaitu, Vincent H Pala chuan an party chu party dang thawhpui tura an inhawn reng thu sawiin BJP erawh an thawhpui duh loh thu a sawi.

Pala hian an party-in National People's Party (NPP) kaihhruai Khasi Hills Autonomous District Council (KHADC) executive committee chu an thawhpui dawn em tih zawhna awm a chhannah he thu hi sawiin,"He ram mi dik takte mamawh pea thawk tur leh, an hnam leh tihdante vawnghim a, chhawm nung tur hian BJP tih loh chu tu pawh thawhpui dawn ila kan inhawng reng a ni," tiin a sawi. Congress chuan Northeast huam chhunga autonomous district council-te inkaihhruaina neih, sixth schedule siam ṭhat chu an duh thu sawiin, NPP ngaihdan chu ṭawmpui ve kher lo mah il a, Congress-in ngaihdan hran an neih thu Pala hian a sawi bawk a. KHADC-a NPP kaihhruai executive committee hi thawhpui turin Delhi lama kan hotute pawhin phalna min pe tawh a ni, a ti.

"Sixth schedule siam ṭhatna tur hi 2019 khan Rajya Sabha-ah put luh a ni tawh a, Meghalaya sorkar pawhin ratwna a neihte a lo thlen tawh bawk. Kei chuan sixth schedule siam ṭhat hi thil har lutuk turah ka ngai lo a, a rei berah ni 2 aṭanga ni 3 chhunga zawh fel theih a ni," tiin a sawi bawk.