Manipur police-in kum 132 tlinna an lawm

Manipur police chuan First Manipur Rifles Parade Ground-ah kum 132 an tlinna an lawm thu sawiin, Manipur police danglam bikna chu an thawhrimna, harsatna leh hrehawmna hnuai pawha an chhelna leh an inthunun tlat ṭhinna chu a nih thu an sawi.

Manipur police thuchhuahah chuan an lo kal tawh dan thlir letin, uluk leh felfai zawka hnu chhui an kalpui tawh thu te, mipuite tana nelawma an awm tawh thu leh Manipur mai ni lo, India ram tana thawhna rilru an put tawh dante an sawi a,"Manipur police department hian kum 125-na lawm nan 2016 aṭangin inter-battalion competition kan buatsaih ṭhin. Kumina DGP running trophy atana best battalion 2023 chu 1st Battalion Manipur rifles te'n an dawng a ni," tiin, kum 132 an tlin lawmna puala an hun hman dan an tarlang.

Manipur police kum 132 tlin lawmna hi chief minister N Biren Singh chuan khuallian niin a hmanpui a, Manipur DGP, Rajeev Singh pawh he hunah hian a tel bawk. CM chuan Manipur police-te chu chhuanawm a tih thu sawiin,"Vawiinah hian kan state chhunga dan leh thupek kenkawh a nih theihna atana chhum lo chat loa hnathawk ṭhin kan police-te inpekna kan lawm mek a ni. Thil sual beihna kawng leh mipuite thlamuanna atan an thawk a, an hnathawh zawng zawng piah lamah Manipur police-te'n kum 132 an tlinna hi ka lawmpui a ni. Kan state hma lam hun atan kan police-te hnathawh zel turah duhsakna ka hlan bawk a ni," tiin CM hian X-ah a tarlang. CM hian Manipur tualchhung buaina avanga in leh lo chante tana sum faia ṭanpuina pek an nih tur thu te, CM support scheme hnuaia ṭanpuina hrang hrang pek chhuah tum a nih thute a sawi tel bawk.