Manipur HC-in Meitei Leepun chief man theih lohna thupek chhuah

Churachandpur Chief Judicial Magistrate-in June thlaa Churachandpur police station-a thubuai theh luh denchhena, October 9-a Meitei chief, Pramot Singh manna tur thupek a chhuah chu Manipur High Court chuan hnawlin, Pramot Singh hi kumin December thla thleng man theih a ni lo tiin thupek a chhuah ve leh.

Manipur-a tualchhung buaina chhuak chungchangah Pramot Singh hi hnam leh hnam inkara inhuatna thu sawi leh, The Wire interview-naa ram himna atana pawi thei thil a sawi avangin a lakah hian thubuai theh luh a ni. October 9 khan Churachandpur chief judicial magistarte chuan manna tur thupek a chhuah.

Man a nihna tur thupek chhuah hi Pramot Singh hian Manipur High Court-ah khingin, a laka thubuai theh luh chu tihtawp a phut bawk. Justice Ahanthem Bimol Singh chuan kumin December 6-a hearing neih a nih hma chuan man theih lohna tur thupek hi a chhuah zui ve ta a ni.

Pramot Singh hian High Court-a a thu thlenah hian amah man theihna thupek chhuah a nih chu news aṭanga a hriat chauh thu leh, court-a inlan tur emaw, notice emaw engmah a dawn loh thu a sawi. A lak FIR theh luh chu a copy an pek a, court-a inlan tura hriattirna pek a nih phawt chuan a thubuai chungchang chhui zuina pawh a pawm tur thu a sawi bawk.

High Court chuan,"Manipur dinhmun la derthawng tak ngaihtuah chung leh, thu rawn thehluttu nunna pawh derthawng thei a nih avangin, thutlukna mumal zawk siam tura hearing neih leh a nih hma chuan Churachandpur chief judicial magistrate hmaah hian inlan tura tihluih theih a ni lo. Court phalna hmu lo chuan man pawh a theih rih lo a ni," tiin a tarlang. Man theih loh tura thu a tihchhuah piah lamah hian, Manipur High Court hian Pramot Singh-a'n a laka thubuai theh luhte hnawl tura a ngenna chu Manipur sorkar leh Churachandpur leh Imphal West-a police-te hnenah notice a pe bawk. Pramot Singh lakah hian Churachandpur police station bakah Kangokpi police station-ah pawh thubuai theh luh a ni.