NSF-te'n ILP khauh taka kalpui turin ngiat

Naga Students' Federation (NSF) chuan Nagaland, a bikin Dimapur tan Inner Line Permit (ILP) chu khauh taka kalpui turin an ngiat. NSF-te hian chief secretary hnenah lehkha thawnin, ILP chu an state tana kum 150 chhunga thil pawimawh tak a lo ni tawh thu leh, khualzin lut leh chhuak te, raltlan lut ru tur ven nan te a ṭangkai thu an hrilh.

NSF President, Medovi Rhi leh general secretary, Chumben Khuvung te chuan,"Tun kum 60 ral ta chhunga ILP kalpui dana harsatna leh a hlawhchhamna ṭhenkhatte hi kan en liam mai mai thei lo. ILP hman ṭhat loh avang hian kan ram mi dik takte leh kan hnam nunphung leh nihnate chim ral mai hlauhawmah a ding mek a ni. Dimapur-a hnam dang mi eng emaw zat hmuh theiha awm leh, document nei mumal lo awmte hian ILP hman danah kan khauh tawk lo tih hi a lantir chiang hle. An nihna fiahna tur document nei lo mi awm hian nghawng ṭha lo tak a nei thei a, chu a nghawng chhe tak chu Dimapur mai ni lo, Nagaland bakah North East pumpui tan hian a hlauhawm a ni," tiin an sawi.

District hrang hrangah ILP neite endikin an vil ṭhin thu sawiin, an thiltih aṭanga an state-a ILP kalpui a nih dan chu a ṭhat tawk loh thu an sawi. ILP hman thlah dul avanga raltlan an pun nasat thu leh, chung raltlante chu anmahni ram fate chim ral theitu an nih tawh thu an sawi a ni. Dimapur-a ILP hman dan chungchanga thuneitute nem lutuk a an hriat thu leh, Bengal Eastern Frontier Regulation (BERF), 1873 kalpui dan khauh tawk lo chuan raltlan leh lo lut ru te tan hmun him a siamsak nia an hriat thu an sawi bawk.

NSF te chuan Dimapur railway station leh Dimapur airport-ah te ILP Cell dah an duh thu sawiin, Nagaland luh leh chhuah theihna zawng zawngah ILP monitoring cell din an duh thu te an sawi bawk. District headquarter zawng zawngah ILP khauh zawka kalpui a nih theihna tur atan sorkar chu an duh thu sawi bawkin, dan khauh zawk siam a, ILP dan bawhchhia te hremna na zawk pek pawh a ṭul thu CS hnenah hian an thlen a ni.