Hornbill festival neih laia thil man sang tur vil dawn

Kohima Chamber of Commerce & Industry (KCCI) chuan kum tina neih ṭhin, Hornbill festival neih laia zan carnival-a thil man sang ṭhin chu khauh taka vil an tum thu an sawi.

KCCI chuan press conference an neihnaah hei hi sawiin,"Kumin carnival-ah hian helaia tribal-te zinga mi entrepreneur chawikan tum a ni a, hnam bil ei phung leh khawtual chhuak ei tur lamte dah pawimawh a ni ang. Hetih rual hian hmun dang aṭanga khawtual mi entrepreneur leh Selh Help Group (SHG) te, Non-Governmental Organisation (NGO) te pawh kan dah pawimawh dawn a ni. Thil man uchuak taka lo siam a, lo hralh chhuak ṭhin te pawh uluk taka vil an ni anga, a ṭul angin hma kan la zel bawk ang," an ti.

Hornbill night carnival hi KCCI chuan chhungkaw tana buatsaih a nih thu sawiin, chhungkaw tinin an tem theih tur boruak siam an tum thu an tarlang.