Bungraw phur rel-in Tripura thleng

Ṭhawtanni khan bung-raw phur chi rel chu Assam aṭangin Tripura panin a tlan ṭan ta. He bungraw phur chi rel hian pindan 21 neiin,Thawhtanni khan a vawikhat nan Jirania railway station a thleng a, Northeast Frontier Railway (NFR) leh Tripura Transport Minister Manik Dey ten an lo hmuak a ni.

Manik Dey chuan,"Rel hi ngawrh taka a tlan chuan, bungrua, buhfai, fuel te chu a thleng zung zung thei tawh ang a, a man pawh a tlawm zawk dawn a ni "a ti. Minister chuan,"Rel hmanga inkalpawhna hi thil ṭangkai leh pawimawh em em a ni a, tun aṭanga reilo te-ah mihring phur chi rel pawh Tripura aṭanga India ram hmun hrang hrang paltlang chu tlan tlan tir thuai tum a ni. Rel kawng pawh peih fel a ni tawh" a ti.

Railway Minister Suresh Prabhu chuan Inrinni khan Silchar-ah Poorvottar Sampark Kranti Express, Silchar-Assam leh New Delhi kartin tlan tur chu a lo vai liam tawh a, hei bakah hian bungraw phur rel Agartala, Tripura, Jiribam Manipur te chu tlan tir an lo ni tawh bawk. New Delhi-Silchar, Assam, Guwahati, New Coochbehar leh Jalpaiguri West Bengal-ah te Express rel tlan tir tura hmalak mek a ni bawk. February thla tir khan Silchar-Sealdah Kanchanjunga ah express tlan tir a ni a, nikum lam khan Barak Valley, Assam chu rel kawng siamna map-ah telh a ni a, mihring phur rel chu rel chu Silchar leh Guwahati inkar-ah November ni 21 aṭang khan a lo tlan tan tawh bawk.

Kum 1996 khan Lumding-Silchar leh Badarpur-Agartala inkalpawhna tur, km 437 a thui rel kawng siamna tur sum pek chhuah a nih thu national project chuan kum 2004 khan a puang. Kum 2006-2009 khan hna hi thawh ṭan lo ni tawh mah se, harsatna tam tak a awm avangin hna thawh chak theih a ni lo. A thawh khat nan km 210 a thui Lumding-Silchar chu kum 2015 khan peihfel a ni.

Lumding-Silchar rel kawng hi Assam state chhim lama chengte chuan an ṭangkaipui hle. An ni bakah hian tlangrama cheng heng Tripura, Mani-pur leh Mizoram te innghahna pawimawh tak niin, buhfai, bungrua, oil leh petroleum bakah thil chi hrang hrang lak khawmna pawimawh tak a ni.

A thawh hnihnaah hian Badarpur-Agartala inkar km 227 a thui chu chhunzawm leh mek niin, kumin March thla ral hmaa peihfel hman beisei a ni. A vaia peih fel a nih hunah chuan km 600-a thui a ni ang.