Oil India Limited-in Sum a hloh hnem

Assam-a zirlai pawl pahnih Motok leh Moran Students’ Unions ten February ni li 4-5 chhunga nawrh an huaihawt chuan nghawng a nei lian hle a, a nei chho zel dawn ni pawhin a lang.

Zirlai pawl lungawilo ten tun thla tir lama kawngpui an dan avang khan Oil India Limited (OIL) chuan cheng vaibelchhe 40 chuang an hloh. The Assam Tribune-in a tarlan dan chuan, ni hnih chhung nawrh huaihawt a nih vang khan public sector company hna thawh tam tak chu a nghawng a, sorkar kum kal laiah metric tonne 17,000 an hloh a ni. OIL bik hian crude oil metric tonne 5000-10000 vel hloh anga ngaih a ni bawk.

Nawrh huaihawt vang hian oil lak chhuah hna chawlhsan a ngai a, an ruahmansa anga an kal theih tak loh avang hian OIL te chuan cheng nuai 5-20 vel an hloh a ni. Hengte a nih avang hian oil leh gas an lak chhuah tur zat an beisei leh sem chhuah tur an ruahman te nasa takin a ngawng dawn a, hun leh sum tam tak an chan phah a ni.