Ni thum awh tur cultural fest Ukhrul-ahṭan

Ni thum awh tur Cultural festival ‘Discover North East’ chu Ukhrul, Manipur-a Bakshi Ground -ah Ukhrul Deputy Commissioner Modak Hri-sheekesh Arvind-an a hawng.

Nimin khan hmarchhak hmun hrang hrang aṭangin hnam hrang hrang ten an hnam hla leh lam te an entir. Ni hnihna leh ni thumna hi Ukhrul district-a thingtlang khaw pahnih Longbi leh Talui-ah te hman a ni ang. He festival-in a tum ber chu ram chhung hmun hrang hranga hnam hrang hrangte kan hnam zia leh tihdan phung te inhriat pawh a ni a, cultural festival hi Ukhrul distric-in a thlen vawi khatna a ni.

Deputy Commissioner Modak Hrisheekesh Arvind chuan, "He festival hi tualchhuang artist te tih phurna tur te, kut themthiam ten an thiamna an pho chhuahna hun remchang leh culture-a kan hausak zia pholanna a ni. He festival buatsaih a nih chhan chu, hnam hrang hrang te zingah in unauna ṭha siam a ni" a ti. DC chuan India ram hmun hrang hrang atanga he festival chhim tura lo kal te chu thinlung taka an lo lawm thu a sawi bawk.

North Zone Cultural Centre Deputy Director D Vashum pawhin festival buatsaih a nih chhan sawiin,"Ṭhalai, a bikin kum la naupang talent nei tha tak tak te chu India ram mai nilo khawvel huap pawha zahpuiawm lo khawpa chher chhuah a tum a ni" a ti. ‘Discover North East'-ah hian Nagpur, Kolkatta, Allahabad, Mizoram, Sikkim, Tripura leh Imphal aṭang tein mi engemaw zat an fuankhawm a ni.