Sikkim-a tuilian tuar chhungkuate Rs nuai 1 ṭheuh pe

Sikkim-a Chungthang khuaa cheng, October 3-a tuilian avanga an chenna in chan chhungkaw 52-te hnenah chhawmdawlna, cheng nuai khat ṭheuh pek an ni.

Tuilian hian Chungthang bial kalpawhnate a tihchhiat tel avangin, chief minister Prem Singh Golay chuan tuilian a thlen aṭanga ni 19-na, Pathianni khan a tlawh thei chauh a ni. Chenna in chan chhungkuate hnenah ṭanpuina hi a sem nghal a ni.

Chief Minister chuan Chungthang-a non-permanent resident-te hnenah thla 10 chhung an inluahna man puihna turin Rs 20,000 ṭheuh a sem bawk a, chhungkaw 161 in he ṭanpuina hi an dawng.

Chungthang Panchayat president Deeki Lepcha chuan an thil phut hrang hrangte chu CM hnenah hian ziakin a lo thlen a, heng zingah hian in chhiate sak ṭhat leh thuai a nih theihna atana pui tur te, non-permanent resident te awmna tur ngaihtuahsak te, power department office thar siam leh, protection wall siamte pawh a tel.

Tulian avanga Sikkim hmarlam kalpawh hleih theih loha a awm hnuah, Indian Army leh Border Road Organisation (BRO)-ten Sanklang-Theng-Chungthang inkalpawhna tura Teesta lui chunga bailey bridge an siam chu an peihfel ta. Lei dang pakhat pawh siam mek a ni bawk. Lei an siam zawh tak hi feet 150-a thui niin, a pahnihna hi October 27 hian peihfel hman tum a ni bawk. Lei siam hna thawhnaah hian tualchhung mite theihtawpin an pui bawk.