Meghalaya-ah India-Malaysia joint army exercise ṭan

India leh Malaysia army-te chuan joint training exercise, Exercise Harimau Shakti 2023 chu Meghalaya-a Umroi cantonment-ah Thawhṭanni aṭang khan an nei ṭan.

Official-te'n an tarlan danin, joint exercise-ah hian Malaysia army contingent hi 5th Royal Battalion of Malaysian Army-te an ni a, India contingent hi Rajput Regiment battalion te an ni.

Joint army exercise hi November 5 thleng neih tura ruahman a ni a, ram pahnih aṭang hian sipai 120 ve ve tel thei tura beisei a ni. Defence official-te chuan Exercise Harimau Shakti, 2023 chu hmun hrehawm leh chhengchhe zawk pawh a sipaite'n thil chi hrang hrang an thiam leh an tih theih nana inzirna hun tur a nih thu an sawi a,"Joint exercise neih a nih chhung hian ram pahnih sipaite hian joint command post siamin, surveillance grid mumal tak dinin, Joint Surveillance Centre an din bawk dawn a ni" an ti. Sipaite hian ramhnuaia intirh chhuah dan te, an chet tlatna danglam dan zela hmelma hmachhawn dan te an zir dawn a, heng bakah hian hnu chhuina lama mamawh lak khawm te, hnathawhho dan leh drill chi hrang hrang an enchhin bawk ang.

Joint exercise-ah hian drone/UAV, helicopter hmanna thil chi hrang hrang entir a ni dawn a, hliam enkawl dan te, inchhanchhuah dan te, Battalion level-a mahni sahimna atana khawsak dan tur thlengin an zir dawn bawk a ni. India leh Malaysia hian nikum November khan Pulai, Kluang, Malaysia-ah joint army exercise an lo nei tawh a ni.