AP: Defence Minister-in LAC-a sipaite Dussehra a hmanpui

Defence minister Rajnath Singh chuan Arunachal Pradesh ramria duty sipaite tlawhin, a hmunah thil awmdan a enfiah. Rajnath Singh hian Line of Actual Control (LAC)-a sipaite hi Dussehra a hmanpui nghal a, ramria awm a, ram venhim hna thawk ṭhinte chu an inpekna leh an hnathawh ṭhat avanga mimal taka a lawm thu hrilhin, an huaisenna ang chu tu mahin an neih ve theih loh a nih thu a sawi.

Rajnath Singh hian Tawang-a sipaite zingah Shastra Puja a tihpui a, Dussehra chu ṭhatnain sual a hneh ṭhin tih entirna hun ropui tak a nih thu a sawi. Defence Minister chuan India sipaite huaisenna leh inpekna avanga khawvel huapa India a din chhuah ve theihna chu ropui a tih thu a sawi. Tun hnaia Italy a tlawh ṭum pawhin Montone memorial a tlawh tih a sawi a, he hmun hi N Yaswant Ghadge mai bakah India sipaite'n Indopui pahnihna hunlaia Italian war an beihna chawimawina leh hriatrengna atana siam a ni, a ti. India mai ni lo, Italian-te pawhin India sipaite huaisenna chu an ngaihsan thu a sawi bawk.

Arunachal Pradesh-ah hian Tawang memorial te tlawhin, 1962 indonaa nunna hlante chawimawina leh sunna hun a hmang a ni. LAC-a hmasawnna hnathawh hrang hrangte hrilh leh hriattir a ni a, sipaite tana ralthuam leh indona hmanraw ṭha tak takte dah luh belh reng a nih thu an sawi bawk.

Singh hi Chief of Army Staff General Manoj Pande bakah General Officer Commanding-in-Chief Eastern Command, Lt. Gen. RP Kalita leh GOC, 4 Corps Lt. Gen. Manish Erry te chuan a ṭawiawm a ni.