Hel pawl mi leh sa leh ralthuamte Manipur police-in man

Manipur chief minister Biren Singh chuan Manipur police leh central armed forces mi leh sate'n joint operation an neih aṭangin Myanmar hel pawl mi ni ngeia hriat mi pahnih leh an ralthuamte an mansak thu a sawi.

Biren Singh chuan Manipur police-te'n ralthuam an man zingah hian AK47, Insas, sniper leh M16 rifle a tel thu sawiin, silai mu eng emaw zat an man tel bawk a, opium kg 2.5 bakah, pawisa fai Rs. 4,86,500 man a nih thu a sawi bawk. An mi mante hi Myanmar-a innghat hel pawl, CKLA mi leh sa nia hriat an ni.

CM chuan National Investigation Agency (NIA) pawhin hetiang kaihhnawih case hi an chhui zui mek thu sawiin, Myanmar leh Bangladesh vela hel pawlte chuan Manipur buaina chu remchanga lain India sorkar do an tum nia hriat a nih thu a sawi.

Hetih lai Manipur police-te hian October 23 khan hel pawl mi leh sa ni ngeia hriat mi pakhat an man thu an sawi tawh bawk a, an mi man hnen aṭang hian cartridges 1,2000, puak thei thil 68 an man tel thu an puang bawk. Imphal West-a Moirangkhom road paltlangnaah traffic police-te chuan motor pakhat tidingin tlanchhiat luih a tum a, mahse, police-te hian an lo dang thei a ni. Motor hi dap nghal a ni a, motor-ah hian 7.62 mm cartridges round 573, 5.56 mm calibre round 294 leh 40 mm lathode explosive te hmuh a ni. An mi man hi hel pawla mi niin an sawi a, mahse, eng hel pawl leh tu mi leh sa nge tih erawh tarlan tel a ni lo thung. An mi man leh a hnen aṭanga an ralthuam man zawng zawng chu Imphal police station-ah a chungthu ngaihtuah tura dah a nih thu an sawi.