Parliament-ah AP Governor report pharh

Arunachal Pradesh-a President's Rule puan a nih chhan leh state chhung politics buaina chungchanga State Governor JP Rajkhowa report chu Parliament in hnihah pharh a ni.

Governor J P Rajkhowa chuan, state chhunga politics buaina avangin dan leh thupek mumal taka kenkawh a harsat thu leh India danpui zawm a harsat thu a sawi. He thu hi 'President's Rule' Arunachal Pradesh-a puan a nih hma ni khan sorkar laipui-ah a thlen a ni. Governor chuan,"Kei leh ka chenpui te chuan he politics buaina hi kan nunna atan a hlauhawm a ni tih kan hria", a ti.

Rajhkowa-a special report chuan MLA 58 zinga 31 chuan Kalikho Pul-a hi house leader atan an pawm a,sorkar thar an siam theih thu pawh an sawi a ni, tiin a sawi.

January 15-a Governor lehkha thehluh hmasaberah chuan, Arunachal Pradesh-ah hmasawnna kalpui theih a nilo a, mipuite nitin mamawh pek a harsa hle a, state-in resources a neih angte pawh enkawl hleitheih a nih loh bakah dan leh thupekin awmzia a awm lo tih a ziak. Kum 2015 September-October vel aṭang khan sorkar lai Congress MLA te inkarah hian buaina a awm ṭan a, a tawpah chuan an kehdarh ta a ni.

Governor chuan sawi chhunzawmin, "House mem-ber 60 awmnaah khatih laia Chief Minister Nabam Tuki chuan thlawptu MLA 26 chauh a nei a, rorellai 21-te chu a lakah an hel tawh a ni" a ti. Hei vang hian union cabinet hnenah President's Rule puang tura rawtna siamin, January 26 khan puan a ni ta a ni, a ti.