AP Assembly-in CM ring tawk

Arunachal Pradesh Chief Minister thar Kalikho Pul chu Ningani khan Arunachal Assembly-ah member ten an ring tawk a ni tih vote hmangin an tichiang.

Arunchal Pradesh-a President's Rule puan hlih a nih hnuah, February ni 19 khan Arunachal Pradesh Chief Minister Kalikho Pul atan rinawmna thu tiamtira lakluh a ni tawh a, Ningani khan 'trust vote' hmangin MLA ten an ringtawk a ni tih an lantir. Hemi ni vek hian Wangki Lowang chu Assembly speaker thar atan lakluh a ni bawk.

Congress MLA ni ṭhin Kalikho Pul hian state chief minister leh Congress hruaitu, Nabam Tuki kaihhruai sorkar chua ualau takina duh loh a lo lantir tawh a, sorkar dinglai chu dodalin MLA engemawzat nen sorkar thar din tumin hma an la a, an hlawhtling ta a ni.

Kar kalta Nilaini khan Congress MLA helte hian meeting an nei a, hetah hian Congress MLA 28 an tel a, Bharatitya Janata Party (BJP) MLA 11 leh Independent MLA 2 ten an thlawp bawk. CM hlui Nabam Tuki leh amah thlawptu, Congress MLA 16-te chu CM fiahnaah hian an tel lo.

CM thar chuan, "Ka tum ber chu state leh a chhunga cheng mipuite tihhmasawn a ni", a ti. Senior BJP MLA Tamiyo Taga chuan,"BJP MLA 11 ten Pul kan thlawpna chhan chu state-in hma a sawn zel thei nan leh sorkar ṭha zawk beisei vang a ni" a ti bawk.

Ningani vek khan Tourism minister hlui Pema Khandu chuan Wangki Lowang chu speaker atan a rawt a, Congress legislator Kamlung Mosang an a thlawp. Speaker thar atan Lowang hi thlan tlin a ni ta a ni. Lowang chuan dik tak leh felfai taka hnathawh a, Assembly chu zahawm taka vawn a tum thu a sawi. Lowang chuan,"Member zawng zawngte chu thawhpuiah ka sawm che u, vawiina kal lo te pawh min thlawp turin ka ngen a, dik tak leh zahawm taka Assembly vawnnun zel ka tum a ni. Chu chu tun atan chauh ni loin, hun lo la kal zel tur atan pawh a ṭul a, hemi tur hian kan zavaia thawhhona ṭha kan neih a pawimawh a ni" a ti.

Pul pawhin Lowang chu a lawmpui thu sawiin,"A ni hi politician hlun leh ṭha tak mai, speaker atana tling tawk, parliament leh India danpui hre chiangtu a ni a, a ni ang speakera kan nei thei tur hi ka lawm khawp mai" a ti.