Manipur legislator ten NSF te chet dan ṭha ti lo

Manipur Deputy Chief Minister Gaikhangam leh Legislative Assembly member te chuan Ningani khan Naga Students’ Federation (NSF) ten mipui rilru chawk tho zawng hma an la chu an duh loh thu leh,buaina nasa zawk a thlen an hlauh thu an sawi.

Gaikhangam chuan,"NSF ten Naga chennna chhehvela Meitei mite lirthei engemawzat an dan chuan thil ṭha lo zawk a hring chhuak ang tih a hlauhawm a ni" a ti. Manipur chu state dangte nena khai khin chi a nilo a, hnam hrang hrang awm khawm an ni tih hre turin NSF te chu a ngen. Deputy CM chuan Manipur-ah hian Naga chief minister 2 kan awm tawh a, amah ngei pawh Naga niin, state Director General of police DGP pawh Kuki a ni, a ti.

NSF te nawrh huaihawt vang hian Ukhrul-a 'Lui Ngai Ni festival' hmang tura kal Manipur MLA leh Minister te motor pawh army leh Assam Rifles-te chuan lo tidingin, Nagaland chief minister leh Mizoram aṭanga kal te pawh venhimna khauh tak pek an ni.

NSF mi engemawzat chuan-na motorte chu Mantripukhri, Imphal East-ah tihdin an ni a, zirlai pawl member-te chu police te an inhnial buai a ni. Police Officer duty Imtiaz chuan Imphal East SP Mr Kamei chu thil thlen dan hrilh vatin, man erawh an neilo tih a sawi. DGP, Khaute chuan hemi chungchang chhui chiang tur hian inquiry a din tawh a, DIG Muivah pawh he mi chungchang sawipui tur hian Nagaland a thleng tawh bawk. Th Shyamkumar, Kh Joykisan leh midang te chuan NSF ten Meitei hnam an bitum bik chu an dem thu sawiin, nawrh huaihawtte avanga zin veivakten harsatna an tawh ṭhin chu tihtawp dan ngaihtuah turin sorkar an ngen. Hei bakah hian kawng dan a nih avanga motor khalhtu mi 100 chuangte chu ngaihsak turin an phut bawk.

Manipur Assembly hian budget session a nei mek a, House chuan Ningani khan demand engemaw zat a pawm belh leh. Ningani-a demand pawmte chu - Finance atan cheng vaibelchhe 1144.73, Information tan Rs vbc 5.53 crore, Excise - Rs vbc Rs 17, Sales tax- Rs vbc 5, Minor Irrigation - Rs vnc 136 , Social Welfare - Rs vbc 283 leh Relief tan Rs vbc 22 te a ni. Public Health Minister Hemochandra chuan thingtlang khaw 2752 leh khawpui 47-ah water supply scheme kalpui mek a ni a ti a, hei hian thingtlang mipui nuai 21.94 leh khawpuia cheng mi nuai 6.35 a huam dawn a ni.